SIM-SCAM-BUSINESSMAN-LOOTED
छत्रपती संभाजीनगर : शहरातील एका व्यावसायिकाची सीमकार्ड हॅक करून ३ लाख २४ हजार ६९२ रुपयांची आर्थिक फसवणूक करण्यात आली आहे. विशेष म्हणजे, तक्रार करून यूपीआय आयडी बंद केल्यानंतरही चोरट्यांनी खात्यातून पैसे काढले. याप्रकरणी क्रांती चौक पोलिस ठाण्यात अज्ञात आरोपीविरोधात गुन्हा दाखल करण्यात आला आहे.
स्पोर्ट्स वेअर व्यवसाय करणारे राकेश गुराल्ले यांना अनोळखी क्रमांकावरून फोन आला. हिंदीत संवाद साधत संबंधित व्यक्तीने, “तुमच्या नावावर क्रेडिट कार्ड आले आहे,” असे सांगितले. राकेश यांनी संशय आल्याने कोणतीही माहिती न देता फोन कट केला. मात्र, दुसऱ्याच दिवशी त्यांचे सीमकार्ड अचानक बंद पडले.
त्याच दिवशी ते केदारनाथ यात्रा करण्यासाठी दिल्लीला गेले असताना नवीन सीमकार्ड घेतले. परंतु, २४ तास एसएमएस सेवा बंद असल्याचा फायदा घेत सायबर गुन्हेगारांनी त्यांच्या बँक खात्यातून यूपीआयच्या माध्यमातून पैसे काढले. तक्रार करूनही दुसऱ्या दिवशी ६०,००० रुपये पुन्हा काढण्यात आले. यानंतर त्यांचे दुसरे बँक खाते तपासले असता, त्यातूनही १ लाख ६४ हजार ६९३ रुपये गायब झाल्याचे आढळले.
या प्रकारामुळे सायबर सुरक्षेच्या पातळीवर मोठे प्रश्न उपस्थित झाले आहेत. नागरिकांनी अशा फसवणुकीपासून सावध राहावे आणि कोणालाही वैयक्तिक माहिती देऊ नये, असा इशारा पोलिसांनी दिला आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/CUZxUMpm5nG0dcievrzNlr
*जाहिरातीसाठी_संपर्क करा 8329014805*