Sambhajinagar-Road-Accident-Fire
छत्रपती संभाजीनगर जिल्ह्यातील गल्लेबोरगावजवळ उभ्या ट्रॅक्टर ट्रॉलीला छोटा हत्ती पीकअप वाहनाने धडक दिल्याने भीषण अपघात झाला. या अपघातात वाहनाने अचानक पेट घेतल्याने चालकाचा जागीच कोळसा झाला, तर दुसऱ्या व्यक्तीचा उपचारादरम्यान मृत्यू झाला. हा दुर्दैवी प्रकार रविवारी सोलापूर-धुळे राष्ट्रीय महामार्गावर घडला. या दुर्घटनेत एक जण जखमी असून, अपघातानंतर स्थानिकांनी मदतीसाठी धाव घेतली.
या भीषण अपघातात ५१ वर्षीय विनायक जालिंदर पाटील आणि ३५ वर्षीय दादासाहेब बाजीराव देशमुख यांचा मृत्यू झाला, तर सलीम मुलानी हे जखमी झाले आहेत. तिघेही सांगली जिल्ह्यातील रहिवासी असून, तासगाव येथून इंदौरला मंडप डेकोरेशनचे सामान आणण्यासाठी निघाले होते. महामार्गावरील गल्लेबोरगावजवळ एका पेट्रोल पंपाजवळ ट्रॅक्टर ट्रॉली उभी होती. शेणखताची वाहतूक करणाऱ्या या ट्रॉलीचे चाक पंक्चर झाल्याने ती रस्त्याच्या कडेला उभी करण्यात आली होती.
याच वेळी भरधाव वेगाने येणाऱ्या छोटा हत्ती पीकअप वाहनाने ट्रॉलीला जबर धडक दिली. धडक एवढी जोरदार होती की, पीकअप वाहनाचा समोरील भाग पूर्णतः चुराडा झाला आणि त्यानंतर त्याला अचानक आग लागली. या आगीत चालक विनायक पाटील वाहनात अडकून जळून खाक झाले. मागील बाजूस असलेल्या सलीम मुलानी यांनी तातडीने मदतीचा प्रयत्न केला. त्यांनी ग्रामस्थांच्या मदतीने दादासाहेब देशमुख यांना बाहेर काढले. मात्र, त्यांना रुग्णालयात दाखल केल्यानंतर डॉक्टरांनी मृत घोषित केले.
हा अपघात किती भीषण होता, हे यावरून स्पष्ट होते की, वाहनाने अचानक पेट घेतल्याने वाचवण्यासाठी वेळही मिळाला नाही. महामार्गावर उभ्या ट्रॉलींमुळे होणाऱ्या अपघातांची संख्या वाढत असून, प्रशासनाने यावर ठोस उपाययोजना करावी, अशी मागणी स्थानिकांकडून केली जात आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/CUZxUMpm5nG0dcievrzNlr
*जाहिरातीसाठी_संपर्क करा 8329014805*