आरजी कर मेडिकल कॉलेजमध्ये घडलेल्या हृदयद्रावक घटनेने संपूर्ण देश हादरला आहे. एका महिला डॉक्टरवर बलात्कार करून तिची हत्या करण्यात आल्याच्या घटनेमुळे वैद्यकीय क्षेत्रात संतापाची लाट उसळली आहे. या अमानवीय घटनेच्या निषेधार्थ इंडियन मेडिकल असोसिएशनने (IMA) 17 ऑगस्ट रोजी देशव्यापी संप पुकारला आहे. या संपामुळे देशातील वैद्यकीय सेवा ठप्प होण्याची शक्यता आहे.
आयएमएने काढलेल्या पत्रकानुसार, 17 ऑगस्ट रोजी सकाळी 6 वाजता सुरू होणारा हा बंद 18 ऑगस्टच्या सकाळी 6 वाजेपर्यंत चालणार आहे. या काळात सर्व दवाखाने, क्लिनिक्स आणि ओपीडी सेवा बंद राहतील. मात्र, अत्यावश्यक सेवा सुरू राहतील, ज्यात आयसीयू, अपघात विभाग आणि प्रसूतीसाठीच्या सेवा या बंदमधून वगळण्यात आल्या आहेत. त्यामुळे या काळात केवळ अत्यावश्यक सेवाच उपलब्ध असतील.
शनिवारी सकाळी 6 वाजता सुरू होणाऱ्या या संपात इंडियन मेडिकल असोसिएशन एकजुटीने सहभागी होणार आहे. आयएमएने रुग्णालयांना सेफ झोन म्हणून घोषित करण्याची मागणी केली आहे आणि आरोग्य कर्मचाऱ्यांसाठी विशेष सुरक्षा कायदा आणण्याची मागणी जोर धरत आहे. देशातील जवळपास 25 राज्यांमध्ये डॉक्टरांच्या सुरक्षेसाठी कायदे असले तरी त्यांची प्रभावी अंमलबजावणी होत नसल्याने, डॉक्टरांच्या सुरक्षेसाठी या कायद्याचे काटेकोर पालन केले जावे, अशी आयएमएची भूमिका आहे.
या संपामुळे देशभरातील रुग्णालयांमध्ये वैद्यकीय सेवा प्रभावित होण्याची शक्यता आहे, त्यामुळे रुग्णांच्या सेवेसाठी आवश्यक तातडीच्या उपाययोजनांची गरज भासणार आहे. हॉस्पिटलमधील 50 टक्के महिला डॉक्टर असल्याने त्यांच्या सुरक्षेचा प्रश्न अत्यंत महत्त्वाचा ठरत आहे.
देशभरातील डॉक्टरांनी एकत्र येऊन आपल्या सहकाऱ्यांच्या सुरक्षेसाठी आवाज उठवला आहे, त्यामुळे या संपाचे परिणाम गंभीर असू शकतात. IMAने देशभरातील सर्व डॉक्टरांना या आंदोलनात सहभागी होण्याचे आवाहन केले आहे.
_________________________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/BkL2FgwQUTO5Drq9ffF9RJ
*जाहिरातीसाठी_संपर्क करा 8329014805*