छत्रपती संभाजीनगर : ‘माँ’ असा आवाज देत ७५ वर्षीय कांचनमाला सुखलाल पिपाडा या वृद्ध महिलेला थांबवत, खोट्या ओळखीचा आधार घेत अज्ञात लुटारूने तब्बल चार तोळे सोन्याचे दागिने लंपास केल्याची धक्कादायक घटना शनिवारी सकाळी घडली. गजानन महाराज मंदिर परिसरात ही फसवणूक घडली असून पोलिसांनी या प्रकरणाचा तपास सुरू केला आहे.
कांचनमाला पिपाडा या शनिवारी सकाळी त्यांच्या घराजवळील (अंदाजे ५०० मीटर अंतरावर) पिंपळाच्या झाडाला पाणी घालण्यासाठी एकट्याच पायी जात होत्या. अॅडव्हान्स्ड ई.एन.टी. रुग्णालयाजवळ एका अज्ञात इसमाने त्यांना थांबवत, ‘‘माँ, मी तुमचा मुलगा सुशीलला ओळखतो. माझे नाव अग्रवाल आहे, मी याच रुग्णालयात काम पाहतो,’’ असे सांगितले. सुशील यांच्याकडून एक महत्त्वाचा धनादेश आला असून, तो रद्द होण्याआधीच घेणे गरजेचे आहे, अशा थापांनी त्याने वृद्धेचा विश्वास संपादन केला.
त्याने वृद्धेला रुग्णालयात नेले आणि “धनादेश देण्यासाठी दागिन्यांचे वजन करून पावती आणावी लागेल,” असे सांगत त्यांच्या अंगावरील २५ ग्रॅमचे मंगळसूत्र आणि १५ ग्रॅमची बांगडी काढून घेतली. यानंतर त्याने सुरक्षारक्षकाला “या पाहुण्या आहेत, डॉक्टर येईपर्यंत त्यांना बसू द्या” असे सांगून निघून गेला. मात्र, बराच वेळ उलटल्यानंतरही तो न आल्याने वृद्धेला फसवणूक झाल्याचे लक्षात आले. त्यांनी घरी जाऊन आपल्या नातेवाइकांना या प्रकाराची माहिती दिली.
विशेष म्हणजे, लुटारूकडे पिपाडा कुटुंबाची संपूर्ण माहिती होती. त्यांच्या मुलाचे नाव, त्यांच्या राहण्याची पूर्वीची जागा (पदमपुरा), बोलीभाषा, इत्यादींचा त्याने उल्लेख केला. यामुळे वृद्धेचा त्याच्यावर विश्वास बसला. परंतु लुटारूकडे ही माहिती नेमकी कशी पोहोचली, याचा तपास करताना पोलिसही चक्रावले आहेत.
घटनेची माहिती मिळताच सिडको पोलीस ठाण्याचे निरीक्षक कृष्णा शिंदे आणि उपनिरीक्षक अर्जुन राऊत यांनी घटनास्थळी धाव घेतली. लुटारूने तपास चुकवण्यासाठी वाहनाचा वापर न करता तीन वेळा रिक्षा बदलत बसस्थानक गाठले. मात्र, दुर्दैवाने बसस्थानकावरील सीसीटीव्ही कॅमेरे बंद होते. त्यामुळे तपासात अडथळा निर्माण झाला असून, पोलिस आता आजूबाजूच्या खासगी सीसीटीव्ही कॅमेरे तपासत आहेत.
या घटनेने परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. वरिष्ठ पोलिस अधिकाऱ्यांच्या मार्गदर्शनाखाली सिडको पोलीस या प्रकरणाचा अधिक तपास करत आहेत.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/JKRmORhlDKD41spUTgpnVl
*जाहिरातीसाठी_संपर्क करा 8329014805*