छत्रपती संभाजीनगर : जागतिक दर्जाची रेफ्रिजरेशन कॉम्प्रेसर बनवणारी ब्राझीलची नामांकित कंपनी ‘एम्ब्रेको’ शेंद्रा डीएमआयसी औद्योगिक वसाहतीत तब्बल हजार कोटी रुपयांची गुंतवणूक करणार आहे. हा प्रकल्प २०२६ अखेरीस कार्यान्वित होणार असून, त्यामुळे सुमारे हजार स्थानिक तरुणांना रोजगाराच्या संधी उपलब्ध होणार आहेत.
‘एम्ब्रेको’ ही निडेक ग्लोबल अप्लायन्सेस या आंतरराष्ट्रीय समूहाचा भाग आहे. ही कंपनी घरगुती आणि व्यावसायिक वापरासाठी हर्मेटिक कंप्रेसर, कंडेन्सिंग युनिट्स व सीलबंद युनिट्स यांची निर्मिती करते. छत्रपती संभाजीनगरमधील शेंद्रा डीएमआयसी परिसरात ५५ हजार चौ. मीटर क्षेत्रावर त्यांचा उत्पादन प्रकल्प उभारण्यात येणार असून, दरवर्षी सहा लाख कंप्रेसरचे उत्पादन या ठिकाणी केले जाईल.
एम्ब्रेकोच्या शिष्टमंडळाने नुकतीच छत्रपती संभाजीनगरमध्ये संभाव्य जागेची पाहणी केली. त्यानंतर मुंबई येथे महाराष्ट्र शासनासोबत सामंजस्य करार (MoU) करण्यात आला. कंपनी ५० एकर क्षेत्रात प्रकल्प उभारणार असल्याची माहिती डीएमआयसी व्यवस्थापक महेश शिंदे यांनी दिली.
या गुंतवणुकीमुळे छत्रपती संभाजीनगर हे औद्योगिकदृष्ट्या देशातील प्रमुख हॉटस्पॉट म्हणून उदयास येत असल्याचे चित्र दिसून येते. मागील काही काळात जेएसडब्ल्यू, अथर, पिरामल फार्मा, टोयोटा-किर्लोस्कर यांसारख्या मोठ्या उद्योगांनी येथे गुंतवणूक केली आहे.
“एम्ब्रेकोसारख्या जागतिक कंपनीने संभाजीनगरची निवड केल्यामुळे शहरासाठी ही एक गेमचेंजर घडामोड ठरणार आहे,” अशी भावना उद्योजक आशिष गर्दे यांनी व्यक्त केली.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/LUuxEbTCGUGCYza17DWFVv
*जाहिरातीसाठी_संपर्क करा 8329014805*