छत्रपती संभाजीनगर तालुक्यातील औरंगपूर गावात मंगळवारी रात्री एक हृदयद्रावक घटना घडली. पत्नीने सासरी जाण्यास नकार दिल्यानंतर चिडलेल्या जावयाने आपल्या सासऱ्याच्या छातीत चाकू खुपसून खून केल्याने गावात एकच खळबळ उडाली आहे.
औरंगपूर येथील रहिवासी सुभाष रूपचंद भगुरे (वय ४५) यांच्या मुलीचे लग्न तीन वर्षांपूर्वी रेलगाव (ता. सिल्लोड) येथील मनोज गुलाब गटोरे याच्यासोबत झाले होते. पत्नी माहेरी राहत असल्याने तिला सासरी नेण्यासाठी मनोज मंगळवारी (दि. १५) सायंकाळी औरंगपूर येथे आला होता. मात्र पत्नीने सासरी जाण्यास नकार दिल्याने पती-पत्नीमध्ये वाद झाला. हे पाहून सुभाष भगुरे यांनी मध्यस्थी करत “रात्र झाली आहे, सकाळी पाठवतो,” असे सांगून समजावण्याचा प्रयत्न केला.
मात्र रात्री सव्वा नऊच्या सुमारास मनात राग धरून मनोजने सासऱ्याच्या छातीत चाकू खुपसून फरार झाला. घडलेल्या प्रकारानंतर घरात आरडाओरड झाली. शेजाऱ्यांनी जखमी भगुरे यांना तत्काळ घाटी रुग्णालयात दाखल केले. मात्र उपचारापूर्वीच त्यांचा मृत्यू झाला.
या प्रकरणी मयताचे भाऊ गणेश भगुरे यांच्या फिर्यादीवरून करमाड पोलिस ठाण्यात मनोज गटोरे याच्याविरुद्ध खुनाचा गुन्हा दाखल करण्यात आला आहे. घटनेची माहिती मिळताच एसडीपीओ पूजा नांगरे, सह पोलिस निरीक्षक प्रताप नवघरे व पोलिस उपनिरीक्षक पी.बी. निकाळजे यांनी घटनास्थळी भेट दिली.
आरोपीला १२ तासांत अटक
खून करून पळून गेलेल्या आरोपीचा शोध घेण्यासाठी करमाड पोलिसांनी तातडीने तपास सुरु केला. आरोपी लामकाना डोंगररांग परिसरात लपल्याची माहिती मिळताच पोलिसांनी सापळा रचून केवळ १२ तासांत मनोजला अटक केली.
या घटनेमुळे औरंगपूर गावात भीतीचे वातावरण निर्माण झाले असून पोलिस अधिक तपास करत आहेत.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/JWPLw3ii1wAKDICCoiRTdD
*जाहिरातीसाठी_संपर्क करा 8329014805*