वाल्मिक कराडवर मकोका: परळी बंदची हाक, समर्थकांचे आंदोलन

खंडणी प्रकरणात अटक झालेल्या वाल्मिक कराडवर अखेर मकोका (महाराष्ट्र कंट्रोल ऑफ ऑर्गनाइज्ड क्राईम अॅक्ट) लावण्यात आला आहे. या कारवाईनंतर कराड समर्थकांनी तीव्र संताप व्यक्त करत परळी शहर बंद ठेवण्याचा निर्णय घेतला. परळी शहरात कडकडीत बंद पाळण्यात येत असून, समर्थकांनी रस्त्यांवर टायर पेटवत निषेध नोंदवला आहे.

वाल्मिक कराडवर एका पवनचक्की कंपनीकडून तब्बल दोन कोटींची खंडणी मागितल्याचा गंभीर आरोप आहे. या प्रकरणाची चौकशी सुरू असतानाच पोलिसांनी संतोष देशमुख हत्या प्रकरणाशीही या खंडणी प्रकरणाचा संबंध असल्याचा संशय व्यक्त केला आहे.

संतोष देशमुख हत्या प्रकरण आणि मकोका कारवाई

संतोष देशमुख हत्या प्रकरणाच्या तपासादरम्यान वाल्मिक कराडवर मकोका अंतर्गत गुन्हा दाखल करण्याची मागणी देशमुख कुटुंबीयांसह सर्वपक्षीय नेत्यांनी केली होती. याआधी कराडने खंडणी प्रकरणात पोलिसांसमोर शरणागती पत्करली होती. मात्र, त्याच्यावर हत्येचा गुन्हा दाखल व्हावा, अशी मागणी सातत्याने होत होती. देशमुख कुटुंबीयांनी या मागणीसाठी सोमवारी पाण्याच्या टाकीवर चढून आंदोलनही केले होते.

देशमुख कुटुंबीयांची प्रतिक्रिया

मकोका कारवाईनंतर संतोष देशमुख यांच्या कुटुंबीयांनी समाधान व्यक्त केले आहे. मात्र, प्रकरणातील अन्य आरोपींवरही कारवाई करावी, अशी मागणी देशमुख यांची कन्या वैभवी देशमुख यांनी केली आहे.

समर्थकांचा निषेध आणि बंदची हाक

वाल्मिक कराडवर मकोका लावल्यानंतर त्याच्या समर्थकांनी परळी शहर बंद पाळत निषेध नोंदवला. रस्त्यांवर टायर पेटवून कराड समर्थकांनी आपला रोष व्यक्त केला. कराडला जातीय राजकारणाचा बळी ठरवले जात असल्याचा आरोप त्याच्या आईने आणि पत्नीने केला आहे. त्यांनी परळी पोलिस स्टेशनसमोर ठिय्या आंदोलन केले होते.

नवीन एसआयटीची स्थापना

संतोष देशमुख हत्या प्रकरणाच्या तपासासाठी नव्या विशेष तपास पथकाची (एसआयटी) स्थापना करण्यात आली आहे. या पथकात कराडशी संपर्कात असलेल्या अधिकाऱ्यांना वगळण्यात आले आहे.

कुटुंबीय आणि समर्थकांमध्ये तीव्र प्रतिक्रिया

वाल्मिक कराडवर मकोका अंतर्गत कारवाई केल्यानंतर त्याच्या पत्नीने निषेध व्यक्त करत ही कारवाई पूर्वनियोजित असल्याचा आरोप केला आहे. दुसरीकडे, देशमुख कुटुंबीयांनी या कारवाईनंतर प्रकरणातील अन्य दोषींना पकडण्याची मागणी केली आहे.

आता पुढे काय?

मकोका अंतर्गत गुन्हा दाखल झाल्याने वाल्मिक कराडसाठी जामीन मिळणे अवघड होणार आहे. या प्रकरणाचा तपास अधिक व्यापकपणे करण्याचे निर्देश वरिष्ठ पोलिस अधिकाऱ्यांनी दिले आहेत. त्यामुळे देशमुख हत्या प्रकरणाचा पुढील तपास कसा होतो आणि दोषींवर काय कारवाई होते, याकडे संपूर्ण राज्याचे लक्ष लागले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/FmoEFVMo2Ia7VB6AlALJKH

*जाहिरातीसाठी_संपर्क करा 8329014805*