डिपॉझिट वाचवण्यासाठी उमेदवारांना किती मते आवश्यक? जाणून घ्या पूर्ण नियम

राज्यातील विधानसभा निवडणुकीचे निकाल उद्या जाहीर होणार असून, या निकालांवर अनेक उमेदवारांचे राजकीय भवितव्य अवलंबून आहे. यावेळी किती उमेदवारांचे डिपॉझिट जप्त होणार, याबाबत उत्सुकता शिगेला पोहोचली आहे.

डिपॉझिट जप्त होणे म्हणजे उमेदवाराचा नामुष्कीजनक पराभव मानला जातो. निवडणूक आयोगाच्या नियमानुसार, कोणत्याही उमेदवाराला एकूण वैध मतांच्या एकषष्ठांश (1/6) मते मिळाली नाहीत, तर त्यांची डिपॉझिट रक्कम जप्त केली जाते.

डिपॉझिट म्हणजे काय?

सर्वसामान्य गटातील उमेदवारांना उमेदवारी अर्ज भरताना १० हजार रुपये तर अनुसूचित जाती-जमातीतील उमेदवारांना पाच हजार रुपये डिपॉझिट म्हणून जमा करावे लागते. या रकमेचा उपयोग निवडणूक प्रक्रियेतील विविध खर्चांसाठी केला जातो. मात्र, डिपॉझिट जप्त होणे हे उमेदवाराच्या राजकीय लोकप्रियतेवरील मोठा प्रश्न उभा करते.

डिपॉझिट परत मिळवण्याच्या अटी

• उमेदवार निवडून आल्यास.
• उमेदवारी मागे घेतल्यास.
• उमेदवाराचे नामनिर्देशन अवैध ठरल्यास.
• मतदानाच्या आधीच उमेदवाराचा मृत्यू झाल्यास.

नोटा मते विचारात घेतली जात नाहीत

विशेष म्हणजे, मतमोजणीदरम्यान ‘नोटा’ला मिळालेली मते वैध मतांमध्ये समाविष्ट केली जात नाहीत. त्यामुळे नोटाला प्रोत्साहन देणाऱ्या परिस्थितीतही डिपॉझिट जप्त होण्याचे प्रमाण अधिक असू शकते.

उद्या जाहीर होणाऱ्या निकालांनंतर किती उमेदवारांनी विश्वास मिळवला आणि किती जणांची डिपॉझिट जप्त झाली, याचा निर्णय होईल. त्यामुळे उमेदवारांसाठी उद्याचा दिवस निर्णायक ठरणार आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/HWWuRmwKsMAJMm50qaLtCn

*जाहिरातीसाठी_संपर्क करा 8329014805*