छत्रपती संभाजीनगर : महानगरपालिकेच्या बहुप्रतिक्षित पाणीपुरवठा प्रकल्पाच्या अंमलबजावणीसाठी मोठा दिलासा देणारा निर्णय राज्य मंत्रिमंडळाच्या आजच्या बैठकीत घेण्यात आला. हडको (HUDCO) या वित्तीय संस्थेकडून राज्यभरातील विविध नागरी सुविधा प्रकल्पांसाठी घेण्यात येणाऱ्या २ हजार कोटींच्या कर्जाला शासन हमी दिली जाणार असून, हमी शुल्कही माफ करण्यात आले आहे. याचा थेट फायदा छत्रपती संभाजीनगरच्या प्रकल्पाला होणार असून, ८२२.२२ कोटींचा वाटा हा केवळ या शहराच्या पाणीपुरवठा प्रकल्पासाठी निश्चित करण्यात आला आहे.
या निर्णयामुळे अमृत 2.0, नगरोत्थान अभियान आणि इतर केंद्र व राज्य सरकारच्या योजनांतर्गत चालू असलेले प्रकल्प अधिक वेगाने पूर्ण होणार आहेत. हे प्रकल्प स्थानिक स्वराज्य संस्थांच्या आर्थिक भागीदारीतून उभारले जात असल्याने त्यांना भांडवली मदतीची गरज होती. त्या अनुषंगाने हडकोकडून कर्ज घेण्याची प्रक्रिया सुरू करण्यात आली असून, त्यास शासन हमी दिल्यामुळे स्थानिक संस्थांना मोठा आधार मिळणार आहे.
यामध्ये केवळ संभाजीनगरच नव्हे तर नागपूर महानगर प्रदेश विकास प्राधिकरणासाठी मलनिःसारण प्रकल्पाकरिता २६८.८४ कोटी, तसेच मिरा-भाईंदर महापालिकेसाठी पाणी प्रकल्पासाठी ११६.२८ कोटी रुपयांचा समावेश आहे. मात्र संभाजीनगर शहराच्या पाणीपुरवठा प्रकल्पाच्या दृष्टीने ही शासन हमी आणि शुल्क माफी हा अत्यंत महत्त्वाचा टप्पा मानला जात आहे.
या निर्णयामुळे पुढील टप्प्यात प्रत्यक्ष निधी वितरण, काम सुरू होणे आणि नागरिकांना नियमित व शुद्ध पाणीपुरवठा मिळवण्याच्या दृष्टीने सकारात्मक पाऊल टाकले गेले आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/KOOzOvmJm8UAlKfzgNGy49
*जाहिरातीसाठी_संपर्क करा 8329014805*