छत्रपती संभाजीनगर : एअरपोर्ट अथॉरिटी ऑफ इंडियाने (एएआय) देशातील १३ निवडक विमानतळांवर आंतरराष्ट्रीय उड्डाणांना चालना देण्यासाठी विशेष प्रोत्साहन योजना सुरू केली आहे. विशेष म्हणजे या योजनेत छत्रपती संभाजीनगर विमानतळाचा समावेश करण्यात आला असून, लवकरच येथून थेट आंतरराष्ट्रीय विमानसेवेचा मार्ग मोकळा होण्याची शक्यता आहे.
चिकलठाणा विमानतळावरून आंतरराष्ट्रीय उड्डाणांची मागणी गेल्या काही वर्षांपासून सातत्याने होत आहे. एअर एशिया एअरलाइन्सने येथून थेट बँकॉक सेवा सुरू करण्यासाठी तयारी दर्शवली आहे. मात्र, अद्याप इमिग्रेशन चेकपोस्टला केंद्र सरकारकडून मंजुरी मिळालेली नाही. या योजनेंतर्गत मंजुरीच्या प्रक्रियेला गती मिळणार असून, लवकरच ही सेवा सुरू होण्याची शक्यता आहे.
एएआयच्या या योजनेचा कालावधी २०२७-२८ पर्यंत असून, आंतरराष्ट्रीय कनेक्टिव्हिटी वाढवणे, प्रवाशांची संख्या वाढवणे आणि विमानतळाच्या पायाभूत सुविधांचा जास्तीत जास्त उपयोग करून महसूल वाढवणे, हे प्रमुख उद्दिष्ट आहे.
या योजनेमुळे मनी एक्स्चेंज, ड्युटी फ्री शॉप, प्रवासी वाहतूक सेवा, रेस्टॉरंट यांसारख्या सेवा विकसित होतील. त्यामुळे स्थानिक रोजगारालाही चालना मिळेल, असा विश्वास व्यक्त केला जात आहे.
“एअर एशिया बँकॉक सेवा लवकरच सुरू होईल. ही योजना शहरासाठी महत्वाची संधी ठरेल,” असे प्रतिपादन सुनीत कोठारी, अध्यक्ष, सिव्हिल एव्हिएशन कमिटी, एटीडीएफ यांनी केले.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/JKRmORhlDKD41spUTgpnVl
*जाहिरातीसाठी_संपर्क करा 8329014805*