छत्रपती संभाजीनगर: साखरपुड्यासाठी नवीन कपडे खरेदी करण्यासाठी निघालेल्या लष्करी जवानाचा अपघात होऊन मृत्यू झाल्याची दुर्दैवी घटना रविवारी (दि. ६) दुपारी १ वाजता घडली. कैलास वसंत डोके (२७, रा. रोहान, ता. देऊळगावराजा, जि. बुलढाणा) असे मृत जवानाचे नाव आहे.
कैलास डोके यांचा साखरपुडा मंगळवारी (दि. ७) धानोरा (ता. फुलंब्री) येथे होणार होता. या तयारीसाठी कपडे खरेदीसाठी ते बुलेट (एमएच २१ बीएक्स ७४३२) गाडीने देऊळगावराजा येथून निघाले होते. मात्र, हसनाबादवाडी-शेकटा (ता. छत्रपती संभाजीनगर) येथे त्यांचा अपघात झाला.
जखमी अवस्थेत त्यांना उपचारासाठी चिकलठाणा येथील जिल्हा रुग्णालयात नेण्यात आले. मात्र, डॉक्टरांनी तपासून त्यांना मृत घोषित केले.
अपघाताच्या आठ तासांनंतरही करमाड पोलिसांकडून अपघाताची सविस्तर माहिती मिळालेली नव्हती. नेमका अपघात कसा घडला हे अद्याप अस्पष्ट आहे. या घटनेमुळे डोके कुटुंबावर शोककळा पसरली असून संपूर्ण गावात हळहळ व्यक्त केली जात आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/FmoEFVMo2Ia7VB6AlALJKH
*जाहिरातीसाठी_संपर्क करा 8329014805*