Prisoner serving life sentence commits suicide in Chhatrapati Sambhajinagar jail
छत्रपती संभाजीनगर: छत्रपती संभाजीनगरच्या हर्सूल कारागृहात एका कैद्याने आत्महत्या केल्याची धक्कादायक घटना समोर आली आहे. पत्नीच्या हत्येप्रकरणी जन्मठेपेची शिक्षा भोगत असलेल्या कैद्याने शनिवारी कारागृहातील बाथरूममध्ये चादरीच्या साहाय्याने गळफास घेऊन आत्महत्या केली. राजू पिराजी अवचार (२९, रा. जिंतूर, जि. परभणी) असे मृत कैद्याचे नाव आहे.
पत्नीच्या हत्येप्रकरणी जन्मठेपेची शिक्षा
१३ मार्च २०२३ रोजी राजू अवचार याने मुलाला दूध पाजण्याच्या कारणावरून पत्नीची हत्या केली होती. त्याने कमरेच्या बेल्टने गळा आवळून तिला ठार मारले होते. या घटनेनंतर त्याच्यावर परभणी जिल्हा सत्र न्यायालयात खटला चालला. १३ जानेवारी २०२५ रोजी न्यायालयाने त्याला जन्मठेपेची शिक्षा सुनावली, त्यानंतर तो मागील पाच ते सहा महिन्यांपासून हर्सूल कारागृहात होता.
कारागृहातच घेतला गळफास
शनिवारी त्याने कारागृहातील स्वच्छतागृहात जाऊन चादरीच्या कापडी तुकड्याने गळफास घेतला. हा प्रकार कारागृहातील कर्मचाऱ्यांच्या लक्षात आल्यानंतर त्यांनी तात्काळ त्याला लटकलेल्या अवस्थेतून खाली उतरवले आणि कारागृहाच्या रुग्णालयात दाखल केले. मात्र, डॉक्टरांनी त्याला तपासून मृत घोषित केले.
आत्महत्येचे कारण अस्पष्ट
कैद्याने आत्महत्या का केली, याचे नेमके कारण अद्याप स्पष्ट झालेले नाही. पोलिसांकडून या प्रकरणाचा तपास सुरू असून, कारागृह प्रशासनाकडूनही चौकशी करण्यात येत आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Br29avqYAlRCU4ytjYm4PJ
*जाहिरातीसाठी_संपर्क करा 8329014805*