छत्रपती संभाजीनगर : शहरातील मिसरवाडी भागातील सनी सेंटर येथील मैदानावर किरकोळ कारणावरून झालेल्या वादातून एका मजुराची चाकूने हत्या झाल्याची घटना गुरुवारी (५ डिसेंबर) रात्री आठ वाजेच्या सुमारास घडली. विकास ज्ञानदेव खळगे (वय ३१, रा. मिसरवाडी) असे मयत व्यक्तीचे नाव असून, त्याचा भाचा गौतम राजू जाधव (वय २१, रा. मिसरवाडी) गंभीर जखमी झाला आहे. सध्या त्याच्यावर घाटी रुग्णालयात उपचार सुरु आहेत.
काय घडले?
मयत विकास खळगे सनी सेंटर येथील मैदानावर गेला होता. त्याठिकाणी त्याच्या परिचयातील दोन ते तीन जण बसलेले होते. किरकोळ कारणावरून त्यांच्यात शाब्दिक वाद झाला. वादाचे रूपांतर मारहाणीत झाले. ही माहिती मिळाल्यावर विकास यांचा भाचा गौतम भांडण सोडवण्यासाठी घटनास्थळी पोहोचला. मात्र, त्याच्यावरही चाकूने हल्ला करण्यात आला.
घटनेची माहिती मिळताच सिडको पोलिस स्टेशनचे अधिकारी घटनास्थळी दाखल झाले. जखमींना तातडीने घाटी रुग्णालयात हलवण्यात आले. डॉक्टरांनी विकास खळगे यांना तपासून मृत घोषित केले, तर गौतमवर उपचार सुरू आहेत.
सिडको पोलीस ठाण्याचे अधिकारी या प्रकरणाचा अधिक तपास करत आहेत. आरोपींनी विकास खळगे आणि गौतम जाधव यांच्यावर चाकूने हल्ला का केला, याचा शोध घेतला जात आहे. घटनास्थळी उपस्थित साक्षीदारांच्या मदतीने आरोपींचा शोध घेतला जात आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/GnHHHWqYNo25fugeR1tv5k
*जाहिरातीसाठी_संपर्क करा 8329014805*