🌩️ वीज कोसळण्यापूर्वी मिळणार अचूक इशारा; प्रत्येक नागरिकाच्या मोबाईलमध्ये हवे ‘दामिनी अ‍ॅप’! 🌩️

छत्रपती संभाजीनगर :  पावसाळ्यात वीज पडण्याचे प्रमाण वाढले असून, यामुळे मागील दहा वर्षांत राज्यात मोठ्या प्रमाणावर जीवितहानी झाली आहे. विशेषतः जून व जुलै या महिन्यांमध्ये वीज कोसळून शेतकरी, जनावरे आणि सामान्य नागरिकांचे प्राण गेले आहेत. ही हानी रोखण्यासाठी शासनाने आता ‘दामिनी’ अॅपचा वापर सुरक्षात्मक उपाययोजना म्हणून करण्याचे निर्देश दिले आहेत.

‘दामिनी’ हे अॅप पृथ्वी मंत्रालय भारत सरकार नवी दिल्ली यांच्या निर्देशानुसार, आयआयटीएम पुणे यांनी विकसित केले असून, वीज पडण्याच्या ३०० किमी परिघातील घटनांची माहिती अगोदरच देते. हे अॅप जीपीएस लोकेशनच्या आधारे काम करत असून, २१ मिनिटे, १४ मिनिटे आणि ७ मिनिटांपूर्वी वेगवेगळ्या पातळीवर पूर्वसूचना देण्यात येते. यामुळे नागरिकांना सुरक्षित स्थळी वेळेत पोहोचता येते आणि संभाव्य जीवितहानी टाळता येते.

अॅपमध्ये वीज पडण्याच्या वेळी झाडाखाली उभे राहू नये, उंच जागेवर किंवा उच्च दाबाच्या तारेखाली थांबू नये, घराच्या बाजूला आधार घेऊ नये यासारख्या सेफ्टी टिप्स देण्यात आल्या आहेत. त्याचप्रमाणे वीज पडल्यास प्राथमिक उपचार काय करावेत, याचीही माहिती यात दिली आहे. हे अॅप मराठीसह सर्व भाषांमध्ये उपलब्ध आहे.

जिल्ह्यातील महसूल विभागासह ग्रामस्तरावरील सर्व शासकीय अधिकारी, कर्मचारी आणि नागरिकांनी हे अॅप डाऊनलोड करून त्याचा उपयोग करावा, असे आवाहन कृषी अधीक्षक प्रकाश देशमुख यांनी केले आहे. चिकलठाणा येथील IMD केंद्रात डिटेक्टर बसवण्यात आले असून, राज्यात १३ ते १४ ठिकाणी लायटनिंग डिटेक्टर कार्यरत आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KOOzOvmJm8UAlKfzgNGy49

*जाहिरातीसाठी_संपर्क करा 8329014805*