वाळूज महानगर : बजाजनगर येथील एक दाम्पत्य दुचाकीवरून घरी जात असताना तिरंगा चौकाजवळ झालेल्या भीषण अपघातात पत्नीचा जागीच मृत्यू झाला. टँकरच्या मागच्या चाकाखाली सापडल्यामुळे त्यांच्या डोक्याचा चेंदामेंदा होऊन त्यांचा जागीच मृत्यू झाला. ही दुर्घटना आज सायंकाळी सुमारे ६.२० वाजता घडली.
मृत महिलेचे नाव सविता रामदास तातडे (वय अंदाजे ४५, रा. अजिंठा, सध्या मुक्काम बजाजनगर, जयभावनी चौक) असे आहे. त्यांचे पती रामदास तातडे या अपघातात गंभीर जखमी झाले आहेत.
तातडे दाम्पत्य एमएच २० सीसी २९६४ या क्रमांकाच्या दुचाकीवरून एस क्लबकडून बजाजनगरच्या दिशेने जात होते. तिरंगा चौकातील सिग्नलजवळ त्यांनी दुचाकी थांबवली होती. त्याच ठिकाणी जीजे ०२ एक्सएक्स ४३२३ हा अवजड टँकर उभा होता. सिग्नल सुटताच त्यांनी दुचाकी सुरू केली असता, मागे बसलेल्या सविता तातडे यांचा तोल गेला व त्या थेट टँकरच्या मागच्या चाकाखाली आल्या. यात त्यांचा जागीच मृत्यू झाला. रामदास तातडे हे बाजूला फेकले गेले असून ते गंभीर जखमी झाले आहेत.
अपघातानंतर परिसरात एकच गोंधळ उडाला. संतप्त नागरिकांनी टँकर चालकाला पकडून चोप दिला व पोलिसांच्या ताब्यात दिले. त्यामुळे काही वेळ महामार्गावरील वाहतूक ठप्प झाली होती.
घटनेची माहिती मिळताच वाहतूक शाखेचे उपनिरीक्षक विठ्ठल घोडके, अजीज परसोवाल, शमशु कादरी, देविदास दहिफळे, पंडित कायंदे आदींनी घटनास्थळी धाव घेतली व वाहतूक सुरळीत केली.
जखमी रामदास तातडे यांना पोलिस व्हॅनद्वारे तत्काळ घाटी रुग्णालयात दाखल करण्यात आले. रात्री उशिरापर्यंत वाळूज पोलिस ठाण्यात गुन्हा दाखल करण्याची प्रक्रिया सुरू होती.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/JKRmORhlDKD41spUTgpnVl
*जाहिरातीसाठी_संपर्क करा 8329014805*