‘छावा’च्या ट्रेलरने केला वाद उभा: मराठा संघटनांचा आक्षेप

अभिनेता विक्की कौशल आणि अभिनेत्री रश्मिका मंदाना यांच्या प्रमुख भूमिका असलेला ‘छावा’ हा छत्रपती संभाजी महाराज यांच्या जीवनावर आधारित चित्रपट लवकरच प्रेक्षकांच्या भेटीला येणार आहे. मात्र या चित्रपटाच्या ट्रेलरमध्ये छत्रपती संभाजी महाराज आणि महाराणी येसूबाई यांना नृत्य करताना दाखवल्यामुळे वाद निर्माण होण्याची शक्यता आहे.

संभाजीराजे छत्रपती यांची भूमिका

छत्रपती संभाजी महाराज यांच्यावर हिंदी चित्रपट येत असल्याने हा मराठी जनतेसाठी अभिमानाचा विषय ठरतो आहे, परंतु या चित्रपटातील काही दृश्यांमुळे नाराजी व्यक्त होत आहे. माजी खासदार युवराज संभाजीराजे छत्रपती यांनी या संदर्भात आपली भूमिका मांडली आहे.

“छत्रपती संभाजी महाराजांचा इतिहास जगभर पोहोचवणे ही अभिमानाची बाब आहे. मात्र, ट्रेलरमध्ये महाराजांना नृत्य करताना दाखवले आहे, यामुळे लोकांना ते कितपत पटेल, याबाबत शंका आहे,” असे संभाजीराजे म्हणाले.

दिग्दर्शक लक्ष्मण उतेकर यांना या संदर्भात चर्चा करून दुरुस्ती करण्याचे आवाहन करत, संभाजीराजेंनी इतिहासकारांसोबत बसून संपूर्ण चित्रपट दाखवण्याची मागणी केली होती. मात्र, दिग्दर्शकांनी इतिहासकारांना भेटण्यास स्वारस्य दाखवले नसल्याचा आरोप त्यांनी केला आहे.

मराठा क्रांती मोर्चाचा तीव्र विरोध

चित्रपटाच्या ट्रेलरमध्ये दाखवलेले नृत्याचे दृश्य हे छत्रपती संभाजी महाराजांच्या प्रतिमेला शोभणारे नाही, असे मराठा क्रांती मोर्चाने म्हटले आहे. मोर्चाने या चित्रपटाला विरोध दर्शवला असून, दिग्दर्शकांनी चित्रपटामधील ऐतिहासिक चुका दुरुस्त कराव्यात, अशी मागणी केली आहे.

छावा संघटना, तृप्ती देसाई, आणि इतर मराठा संघटनांनीही या चित्रपटाला विरोध केला आहे. “ऐतिहासिक सत्यासोबत छेडछाड होऊ नये,” असे मत त्यांनी व्यक्त केले आहे.

“शंभर ते दोनशे कोटी रुपयांचा खर्च करून छत्रपती संभाजी महाराजांवरील चित्रपट तयार करणं हे मोठं पाऊल आहे. पण ऐतिहासिक घटनांचे सत्य आणि मराठी जनतेच्या भावना सांभाळण्याचे दायित्व चित्रपट निर्मात्यांवर आहे,” असे मत संभाजीराजे यांनी मांडले.

प्रेक्षकांच्या प्रतिक्रिया आणि प्रदर्शना संदर्भातील उत्सुकता

‘छावा’ चित्रपटाचे ट्रेलर प्रदर्शित झाल्यापासून हा चित्रपट प्रेक्षकांच्या चर्चेचा विषय ठरला आहे. मात्र, मराठा संघटनांचा विरोध, संभाजीराजे छत्रपतींची नाराजी आणि ऐतिहासिक दृश्यांवरून निर्माण झालेला वाद यामुळे चित्रपट प्रदर्शित होतो की नाही, याकडे सर्वांचे लक्ष लागले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/LJKkgCKh4n33MLqeQ0zqD2

*जाहिरातीसाठी_संपर्क करा 8329014805*