धुळे-सोलापूर महामार्गालगत पांढरी पिंपळगाव शिवारात एका युवकाचा शिर नसलेला मृतदेह आढळल्याने परिसरात खळबळ उडाली आहे. मृत युवकाची ओळख राजू किसन कापसे (वय ३५, रा. विजयनगर, गारखेडा परिसर) अशी पटली आहे. जनावरे घेऊन जाणाऱ्या व्यक्तींनी हा मृतदेह पाहून त्वरित करमाड पोलिसांना कळविले.
राजू कापसे हे बेपत्ता झाल्याची तक्रार त्यांच्या नातेवाइकांनी मंगळवारी (१० सप्टेंबर) दुपारी पुंडलिकनगर पोलीस ठाण्यात नोंदवली होती. त्यानंतर सायंकाळी त्यांचा मृतदेह आढळल्याने हत्या झाल्याचे समोर आले. घटनास्थळी ग्रामीण पोलीस अधीक्षक डॉ. विनयकुमार राठोड, उपविभागीय पोलीस अधिकारी डॉ. सिद्धेश्वर भोरे आणि करमाड पोलीस ठाण्याचे सहायक पोलीस निरीक्षक प्रताप नवघरे यांनी भेट देऊन पाहणी केली.
सदर प्रकरणाच्या तपासासाठी श्वानपथक आणि फॉरेन्सिक तज्ज्ञांच्या मदतीने रात्री उशिरापर्यंत तपास सुरू होता. ही हत्या नेमकी कोणी व का केली याचा शोध पोलीस घेत आहेत.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/BJSJXD6pg1BLvrKC4OK11S
*जाहिरातीसाठी_संपर्क करा 8329014805*