नवी दिल्ली : केंद्रीय अर्थमंत्री निर्मला सीतारमण यांनी संसदेत केंद्रीय अर्थसंकल्प 2026 (Union Budget 2026) सादर केला. सुमारे 85 मिनिटे चाललेल्या भाषणात त्यांनी अर्थव्यवस्थेतील स्थैर्य, भूराजनीतिक आव्हाने आणि दीर्घकालीन विकासावर भर दिला. मात्र, सामान्य नागरिकांना थेट दिलासा देणाऱ्या किंवा निवडणूक-केंद्रित मोठ्या घोषणा या अर्थसंकल्पात दिसून आल्या नाहीत. आयकर स्लॅबमध्ये कोणताही बदल न करता कर भरणे सुलभ करणे, पायाभूत सुविधा, संरक्षण, आरोग्य आणि उत्पादन क्षेत्रावर लक्ष केंद्रित करण्यात आले आहे.
अर्थमंत्री लोकसभेत तामिळनाडूची प्रसिद्ध कांजीवरम साडी परिधान करून उपस्थित राहिल्या. पश्चिम बंगाल, तामिळनाडू, केरळ, आसाम आणि पुद्दुचेरी येथे आगामी निवडणुका असतानाही त्या अनुषंगाने थेट कोणतीही घोषणा करण्यात आलेली नाही.
संरक्षण बजेटमध्ये मोठी वाढ
भूराजनीतिक परिस्थितीचा उल्लेख करत अर्थमंत्र्यांनी संरक्षण बजेट 7.85 लाख कोटी रुपयांपर्यंत वाढवल्याची घोषणा केली. यापैकी 2.19 लाख कोटी रुपये सशस्त्र दलांच्या आधुनिकीकरणासाठी खर्च केले जाणार आहेत. मागील वर्षी ही तरतूद 1.80 लाख कोटी रुपये होती. संरक्षण क्षेत्रातील स्वावलंबन आणि आधुनिक तंत्रज्ञानावर सरकारचा भर स्पष्ट झाला आहे.
अर्थसंकल्पातील प्रमुख 7 घोषणा
• अर्थसंकल्पात आयकर स्लॅबमध्ये बदल न करता सुधारित रिटर्न भरण्यासाठी तीन महिन्यांची मुदतवाढ देण्यात आली असून आता 31 मार्चपर्यंत रिटर्न दाखल करता येईल.
• देशात तीन आयुर्वेदिक एम्स उभारण्याची घोषणा करण्यात आली असून वैद्यकीय पर्यटनासाठी पाच वैद्यकीय केंद्रे स्थापन केली जाणार आहेत.
17 कर्करोगाच्या औषधांवरील आयात शुल्क रद्द करण्यात आले असून हिमोफिलिया, सिकल सेल आणि मस्क्युलर डिस्ट्रॉफी यांसारख्या सात दुर्मिळ आजारांच्या औषधांवरही शुल्क माफ करण्यात आले आहे.
• देशात सात हाय-स्पीड रेल्वे कॉरिडॉर उभारले जाणार असून त्यात मुंबई–पुणे, पुणे–हैदराबाद, हैदराबाद–बेंगळुरू, हैदराबाद–चेन्नई, चेन्नई–बेंगळुरू, दिल्ली–वाराणसी आणि वाराणसी–सिलीगुडी यांचा समावेश आहे.
• टियर-2 आणि टियर-3 शहरांच्या विकासासाठी 12.2 लाख कोटी रुपये खर्च केले जाणार आहेत.
• 15 हजार माध्यमिक शाळा आणि 500 महाविद्यालयांमध्ये कंटेंट क्रिएटर लॅब सुरू केल्या जातील.
• तसेच, सुमारे 800 जिल्ह्यांमध्ये मुलींसाठी वसतिगृहे बांधण्याची घोषणा करण्यात आली आहे.
काय स्वस्त होणार?
• या अर्थसंकल्पात आयात शुल्कात बदल करून काही वस्तू स्वस्त होण्याचा मार्ग मोकळा करण्यात आला आहे. कॅन्सरची औषधे स्वस्त झाल्याने रुग्णांना मोठा दिलासा मिळणार आहे.
• मायक्रोवेव्ह ओव्हनच्या सुटे भागांवरील शुल्क कमी केल्याने भविष्यात त्याच्या किमती कमी होण्याची शक्यता आहे.
• ईव्ही बॅटरी, सौर पॅनेल, तसेच ऊर्जा साठवणूक प्रणालीसाठी लागणारे साहित्य शुल्कमुक्त करण्यात आले आहे.
• निर्यातीला चालना देण्यासाठी समुद्री खाद्यपदार्थ, शूज आणि कपडे स्वस्त होण्याची अपेक्षा आहे.
• विमान प्रवास आणि विमान देखभाल (MRO) स्वस्त होणार असून, परदेशातून वैयक्तिक वापरासाठी आयात होणाऱ्या वस्तूंवरील कर 20 टक्क्यांवरून 10 टक्के करण्यात आला आहे.
एकूणच, अर्थसंकल्प 2026 हा तात्काळ लोकलक्ष्यी लाभांपेक्षा दीर्घकालीन पायाभूत विकास, आरोग्य, संरक्षण आणि उत्पादन क्षेत्रावर केंद्रित असल्याचे चित्र स्पष्ट करतो.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/IJbzVXxActY7zUsWoQ3lSr?mode=gi_t
*जाहिरातीसाठी_संपर्क करा 8329014805*