मुंबई: शिवसेना शिंदे गटाच्या मुख्य प्रतोद पदावर वैजापूर विधानसभा मतदारसंघाचे आमदार रमेश बोरनारे यांची निवड करण्यात आली आहे. सत्ताधारी गटाने त्यांना ही जबाबदारी सोपवली आहे. मुख्य प्रतोद पदावर नियुक्तीनंतर बोरनारे यांनी तातडीने शिवसेनेच्या सर्व 57 आमदारांसाठी व्हीप जारी केला आहे.
सध्या विधानसभेचे विशेष अधिवेशन सुरू असून, आज (9 डिसेंबर) या अधिवेशनाचा शेवटचा दिवस आहे. याच दिवशी सभागृहात सरकारचा विश्वासदर्शक ठराव मांडला जाणार आहे. या पार्श्वभूमीवर सर्व आमदारांनी अधिवेशनात उपस्थित राहून सरकारच्या बाजूने मतदान करण्याचा आदेश मुख्य प्रतोद रमेश बोरनारे यांनी दिला आहे.
मुख्य प्रतोद रमेश बोरनारे यांनी शिवसेनेच्या सर्व आमदारांना जारी केलेल्या व्हीपमध्ये म्हटले आहे की, “शनिवारी, 7 डिसेंबरपासून सुरू झालेल्या विशेष अधिवेशनात, आज 9 डिसेंबर रोजी सरकारचा विश्वासदर्शक प्रस्ताव मांडला जाणार आहे. शिवसेना विधिमंडळ पक्षाच्या सर्व सदस्यांनी सभागृहात उपस्थित राहून प्रस्तावाच्या बाजूने मतदान करणे बंधनकारक आहे.”
रमेश बोरनारे यांचा राजकीय प्रवास:
रमेश बोरनारे हे 2019 मध्ये वैजापूर विधानसभा मतदारसंघातून आमदार म्हणून निवडून आले. ते उपमुख्यमंत्री एकनाथ शिंदे यांचे निकटवर्तीय मानले जातात. 2022 मध्ये सत्तांतराच्या वेळी आमदार भरत गोगावले यांना मुख्य प्रतोद बनवण्यात आले होते. मात्र आता ही जबाबदारी बोरनारे यांच्याकडे सोपवण्यात आली आहे.
गोगावले यांना मंत्रिपदाची शक्यता:
सूत्रांच्या माहितीनुसार, माजी मुख्य प्रतोद भरत गोगावले यांना मंत्रिमंडळात स्थान देण्याची शक्यता आहे. या बदलामुळे शिवसेना शिंदे गटात नवी राजकीय समीकरणे आकार घेत आहेत.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/GnHHHWqYNo25fugeR1tv5k
*जाहिरातीसाठी_संपर्क करा 8329014805*