छत्रपती संभाजीनगरमध्ये गँगवॉर : हनुमान नगर चौकात हवेत गोळीबार, ‘पीडी कंपनी’च्या दहशतीने शहर हादरले

छत्रपती संभाजीनगर: शहरात कायदा आणि सुव्यवस्थेचा प्रश्न पुन्हा एकदा ऐरणीवर आला आहे. गुरुवारी (१६ एप्रिल) रात्री साडेनऊच्या सुमारास पुंडलीक नगर भागातील हनुमान नगर चौकात दोन गुन्हेगारी गटांमध्ये जुन्या वादातून तुफान राडा झाला. यावेळी ‘पीडी कंपनी’चा म्होरक्या पवन दिवेकर याने हवेत गोळीबार केल्याने परिसरात मोठी खळबळ उडाली. सुदैवाने, या घटनेत कोणतीही जीवितहानी झाली नाही, मात्र भरवस्तीत झालेल्या या प्रकारामुळे नागरिकांमध्ये भीतीचे वातावरण पसरले आहे

वादाची ठिणगी आणि भरचौकातील राडा

मिळालेल्या माहितीनुसार, रांजणे आणि साळवे या दोन गटांमध्ये दोन दिवसांपूर्वी एका सार्वजनिक कार्यक्रमात किरकोळ कारणावरून वाद झाला होता. हा वाद गुरुवारी दुपारी न्याय नगर परिसरात पुन्हा उफाळून आला. रात्रीच्या वेळी दोन्ही गट हनुमान नगर चौकात आमनेसामने आले. यावेळी परिस्थिती हाताबाहेर गेली आणि साळवे याने आपला नातेवाईक व सराईत गुन्हेगार पवन दिवेकर याला मदतीसाठी बोलावले.

काही महिन्यांपूर्वीच कारागृहातून जामिनावर बाहेर आलेला पवन दिवेकर हातात बिअरची बाटली घेऊन घटनास्थळी दाखल झाला. त्याने परिसरात दहशत निर्माण करत शिवीगाळ करण्यास सुरुवात केली. वादाचे रूपांतर हाणामारीत होत असतानाच दिवेकरने आपल्या कंबरेला लावलेला गावठी कट्टा काढून विरोधी गटाला धमकावत हवेत दोन राऊंड गोळीबार केला. गोळीबाराच्या आवाजामुळे परिसरात एकच धावपळ उडाली आणि नागरिक जीव वाचवण्यासाठी सैरावैरा धावू लागले।

पोलीस कारवाई आणि आरोपींची धरपकड

घटनेची माहिती मिळताच पुंडलीक नगर पोलीस आणि गुन्हे शाखेचे पथक सायरन वाजवत घटनास्थळी पोहोचले. पोलिसांची गाडी पाहताच पवन दिवेकर आणि त्याचे इतर साथीदार अंधाराचा फायदा घेऊन पसार झाले. मात्र, पोलिसांनी पाठलाग करून दिवेकरचा नातेवाईक साळवे याला ताब्यात घेतले आहे. घटनेची गांभीर्य ओळखून पोलीस उपायुक्त पंकज अतुलकर, एसीपी मनीष कल्याणकर आणि गुन्हे शाखेच्या वरिष्ठ अधिकाऱ्यांनी घटनास्थळाची पाहणी केली.

कोण आहे पवन दिवेकर आणि ‘पीडी कंपनी’?

• पवन दिवेकर हा शहरातील कुख्यात ‘पीडी कंपनी’ या टोळीचा प्रमुख आहे. गेल्या ४-५ वर्षांत त्याने शहरात आपली मोठी दहशत निर्माण केली आहे.
• गुन्हेगारी पार्श्वभूमी: पवनवर खून, खुनाचा प्रयत्न, प्राणघातक हल्ला आणि खंडणी यांसारखे तब्बल १४ गंभीर गुन्हे विविध पोलीस ठाण्यांत दाखल आहेत.
• सोशल मीडियाचा वापर: ही टोळी सोशल मीडियावर शस्त्रांसह व्हिडिओ पोस्ट करून तरुणांमध्ये दहशत पसरवण्याचे काम करते।

सध्या पोलीस फरार पवन दिवेकर आणि त्याच्या साथीदारांचा कसून शोध घेत आहेत. भरवस्तीत गोळीबार धाडस करणाऱ्या या गुंडांवर आता पोलीस काय कठोर कारवाई करतात, याकडे सर्वांचे लक्ष लागले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KuJrJlfinbj4dlldQCNIAb?mode=gi_t

*जाहिरातीसाठी_संपर्क करा 8329014805*