🔴 बजाजनगर हादरले! साई श्रद्धा पार्कमध्ये महिलेचा थरारक खून; महिलेकडूनच निर्घृण हत्या

छत्रपती संभाजीनगर : वाळूज महानगर परिसरातील बजाजनगर येथील साई श्रद्धा पार्कमध्ये बुधवारी दुपारी घडलेल्या एका भीषण घटनेने संपूर्ण परिसर दहशतीच्या छायेत गेला आहे. एका महिलेने दुसऱ्या महिलेच्या घरात घुसून चाकू व पिस्तूलच्या साहाय्याने अत्यंत क्रूरपणे हत्या केल्याची धक्कादायक घटना समोर आली आहे.

या घटनेत मृत्यू झालेल्या महिलेची ओळख साधना सोनपेटकर (वय ४०, रा. साई श्रद्धा पार्क, वडगाव कोल्हाटी) अशी झाली आहे. तर या प्रकरणातील आरोपी महिला शैला सोनार (वय ४५, रा. बजाजनगर) असल्याचे पोलिस तपासात निष्पन्न झाले आहे. साधना यांच्या पतीचे नाव महेंद्र सोनपेठकर असून ते घटनेवेळी घराबाहेर असल्याची प्राथमिक माहिती आहे.

प्रत्यक्षदर्शींनी दिलेल्या माहितीनुसार, आरोपी महिला थेट साधना यांच्या घरात घुसली आणि कोणतीही पूर्वसूचना न देता त्यांच्यावर धारदार चाकूने सपासप वार केले. या हल्ल्यादरम्यान पिस्तूल देखील घटनास्थळी आढळून आले, त्यामुळे हल्ल्याचा उद्देश अधिक गंभीर असल्याचा संशय व्यक्त केला जात आहे. अत्यंत निर्दयी पद्धतीने करण्यात आलेल्या या हल्ल्यात साधना यांचा जागीच मृत्यू झाला.

घटनेची माहिती मिळताच वाळूज एमआयडीसी पोलिसांनी तात्काळ घटनास्थळी धाव घेत आरोपी महिलेला रंगेहात अटक केली. अटक प्रक्रियेदरम्यान झालेल्या झटापटीत आरोपी महिला किरकोळ जखमी झाली असून तिला शासकीय घाटी रुग्णालयात उपचारासाठी दाखल करण्यात आले आहे.

दरम्यान, या हत्येमागील नेमके कारण अद्याप अस्पष्ट असून वैयक्तिक वाद, आर्थिक व्यवहार किंवा इतर कोणता हेतू होता का, याचा पोलिसांकडून सखोल तपास सुरू आहे. या घटनेने साई श्रद्धा पार्कसह संपूर्ण बाजाजनगर परिसरात भीतीचे वातावरण पसरले असून नागरिकांमध्ये प्रचंड खळबळ उडाली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IFiUHSaNdeRHc992rS9iqG?mode=gi_t

*जाहिरातीसाठी_संपर्क करा 8329014805*