छत्रपती संभाजीनगर : संभाजीनगर आगाराची छत्रपती संभाजीनगरहून सुरतकडे जाणारी एसटी बस आज कन्नड-चाळीसगाव मार्गावरील ऑट्रम घाटात भीषण अपघातग्रस्त झाली. बसमध्ये तब्बल ५९ प्रवासी प्रवास करत होते. घाटातील एका धोकादायक वळणावर अचानक चालकाचे नियंत्रण सुटल्याने बस रस्त्याच्या कडेला असलेल्या कठड्याला धडकून दरीच्या दिशेने सरकली. मात्र, काही अंतरावर असलेल्या झाडाला बस जोरात धडकल्याने तिचा वेग थांबला आणि मोठा अनर्थ टळला.
प्राथमिक माहितीनुसार, बसचे स्टिअरिंग रॉड तुटल्याने स्टिअरिंग जाम झाले असावे. त्यामुळे चालकाला बसवर नियंत्रण ठेवणे कठीण झाले. बस दरीच्या दिशेने जात असल्याचे लक्षात येताच प्रवाशांमध्ये भीतीचे वातावरण निर्माण झाले. काही क्षणांतच बस दरीत कोसळण्याची शक्यता निर्माण झाली होती. मात्र, सुदैवाने बस झाडाला अडकल्याने ती दरीत कोसळण्यापासून थोडक्यात बचावली.
अपघातानंतर बसमधील सर्व प्रवाशांना सुरक्षितपणे बाहेर काढण्यात आले. या दुर्घटनेत चार ते पाच प्रवासी जखमी झाल्याची प्राथमिक माहिती आहे. जखमींना उपचारासाठी रुग्णालयात दाखल करण्यात आले असून, त्यांच्यावर उपचार सुरू आहेत. सुदैवाने या अपघातात मोठी जीवितहानी झालेली नाही.
घटनेची माहिती मिळताच संबंधित यंत्रणा घटनास्थळी दाखल झाली. अपघातग्रस्त बस रस्त्याच्या कडेला अडकल्याने काही काळ घाटातील वाहतुकीवर परिणाम झाला. बस हटवून वाहतूक सुरळीत करण्याचे प्रयत्न करण्यात आले.
दरम्यान, बसचे स्टिअरिंग रॉड तुटल्यामुळेच अपघात झाला की अन्य कोणत्या तांत्रिक बिघाडामुळे चालकाचे नियंत्रण सुटले, याचा तपास संबंधित यंत्रणेकडून करण्यात येत आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/KYaIrqX6xIM3SpZ1FYjFWw?s=cl&p=a&ilr=0
*जाहिरातीसाठी_संपर्क करा 8329014805*