छत्रपती संभाजीनगर : दिवाळीच्या सणाने शहरात आनंदाची पर्वणी आणली असून लक्ष्मीपूजनाच्या निमित्ताने छत्रपती संभाजीनगरमध्ये उत्साहाचे वातावरण निर्माण झाले होते. सकाळपासूनच घरांमध्ये आणि व्यापारी प्रतिष्ठानांमध्ये पूजेची तयारी सुरू होती. सायंकाळी लक्ष्मीमातेची विधिवत पूजा झाल्यानंतर नागरिकांनी फटाक्यांच्या आतषबाजीसह दिवाळीचा आनंद द्विगुणित केला.
यंदा लक्ष्मीपूजनासाठी नागरिकांनी घरांची आकर्षक सजावट केली होती. प्रवेशद्वारांवर रांगोळ्या, फुलांच्या माळा आणि रोषणाईने परिसराला वेगळेच सौंदर्य प्राप्त झाले होते. घराघरांत पणत्या आणि दिवे लावून लक्ष्मीमातेचे स्वागत करण्यात आले. कुटुंबातील सदस्यांनी एकत्र येत पूजाविधी पार पाडला. सुख, समाधान आणि आर्थिक भरभराटीची कामना यावेळी करण्यात आली.
शहरातील व्यापारी वर्गासाठीही लक्ष्मीपूजनाचा दिवस विशेष महत्त्वाचा ठरला. अनेक दुकानांमध्ये नवीन हिशेबाच्या वह्यांचे पूजन करण्यात आले. व्यावसायिकांनी आपल्या प्रतिष्ठानांची आकर्षक सजावट करून लक्ष्मीपूजन केले. आगामी काळात व्यवसायात प्रगती व्हावी आणि आर्थिक सुबत्ता लाभावी, अशी प्रार्थना करण्यात आली.
फटाक्यांच्या रोषणाईने रात्रीचे आकाश उजळले
पूजाविधी आटोपल्यानंतर रात्री शहरातील विविध भागांत फटाके फोडण्यास सुरुवात झाली. आकाशात उंच झेपावणारे रॉकेट, विविध रंगांत फुलणारे आकाशफटाके आणि जमिनीवर रंगांची उधळण करणाऱ्या आतषबाजीमुळे परिसर उजळून निघाला. अनेक ठिकाणी लहान मुलांसह कुटुंबीय फटाके फोडण्याचा आनंद घेताना दिसले.
जाधववाडी, जुना मोंढा, तसेच शहरातील विविध वसाहती आणि सोसायट्यांमध्ये दिवाळीचा उत्साह जाणवत होता. काही ठिकाणी रात्री उशिरापर्यंत फटाक्यांची आतषबाजी सुरू होती. आकाशात उमटणारी रंगीबेरंगी रोषणाई आणि फटाक्यांच्या आवाजाने शहरात सणाचे वातावरण अधिकच रंगतदार झाले.
दिव्यांची रोषणाई, पारंपरिक पूजाविधी, कुटुंबीयांचे एकत्र येणे आणि फटाक्यांची आतषबाजी अशा विविध रंगांनी यंदाची दिवाळी संभाजीनगरकरांसाठी आनंददायी ठरली.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/CF89MLzjXiJLRGIbwDr7te
*जाहिरातीसाठी_संपर्क करा 8329014805*