छत्रपती संभाजीनगर : दारूच्या नशेत माणूस काय करेल, याचा नेम नाही! याचाच प्रत्यय छत्रपती संभाजीनगर जिल्ह्यातील रांजणगाव शेणपूंजी परिसरात आला. एका तरुणाने नशेच्या अवस्थेत स्वतःची दुचाकी रस्त्याच्या मधोमध पेटवून दिली. त्यानंतर त्याच ठिकाणी रस्त्यावर झोपण्याचा प्रकारही त्याने केला. या अनपेक्षित घटनेमुळे वाहनचालकांची तारांबळ उडाली, तर परिसरात काही काळ गोंधळाचे वातावरण निर्माण झाले.

मिळालेल्या माहितीनुसार, संबंधित तरुण मद्यधुंद अवस्थेत होता. त्याने अचानक स्वतःच्या दुचाकीला आग लावली. दुचाकी पेटल्यानंतरही त्याने तेथून दूर जाण्याची तसदी घेतली नाही. उलट रस्त्यावरच झोपून राहिल्याने परिस्थिती अधिक गंभीर बनली. पेटत्या दुचाकीमुळे अपघात किंवा इतर अनर्थ घडण्याची शक्यता निर्माण झाली होती. या मार्गावरून जाणाऱ्या वाहनचालकांना त्यामुळे पुढे जाणेही कठीण झाले.

पोलिसांनी आधी तरुणाला बाजूला केले

घटनेची माहिती मिळताच पोलिसांनी घटनास्थळी पोहोचून परिस्थिती हाताळली. रस्त्यावर झोपलेल्या तरुणाला प्रथम बाजूला करण्यात आले. त्यानंतर पेटलेल्या दुचाकीची आग विझवण्यात आली. या संपूर्ण प्रकारामुळे संबंधित मार्गावरील वाहतूक जवळपास अर्धा तास प्रभावित झाली होती. पोलिसांनी अडथळा दूर केल्यानंतर वाहनांची ये-जा पुन्हा सुरू झाली.

कृत्यामागचे कारण अद्याप गुलदस्त्यात

स्वतःच्याच दुचाकीला आग लावण्यामागे तरुणाचा नेमका उद्देश काय होता, याची माहिती अद्याप समोर आलेली नाही. दरम्यान, या घटनेचा व्हिडिओ समोर आला असून, मद्यधुंद अवस्थेतील तरुणाच्या या कृत्याची परिसरात चर्चा रंगली आहे. सार्वजनिक रस्त्यावर अशा प्रकारे आग लावणे आणि वाहतुकीला अडथळा निर्माण करणे किती धोकादायक ठरू शकते, हे या घटनेतून पुन्हा अधोरेखित झाले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/CF89MLzjXiJLRGIbwDr7te

*जाहिरातीसाठी_संपर्क करा 8329014805*

1,182 Views

Leave a Reply

Your email address will not be published. Required fields are marked *

You missed

error: Content is protected !!