छत्रपती संभाजीनगर: हवामानाचा अचूक अंदाज वर्तवण्यासाठी आणि आपत्ती व्यवस्थापन अधिक सक्षम करण्यासाठी म्हैसमाळ येथे सी-बँड डॉप्लर रडार उभारण्यास केंद्र सरकारने मंजुरी दिली आहे. तब्बल १५ कोटी रुपये खर्चून हा प्रकल्प साकारला जाणार आहे. यामुळे ४०० किमी परिघातील हवामानाची सविस्तर माहिती नागरिकांना मिळणार असून, वादळाची माहिती तीन ते चार दिवस आधीच कळू शकणार आहे.
माजी केंद्रीय अर्थ राज्यमंत्री खा. डॉ. भागवत कराड यांनी याबाबत माहिती देताना सांगितले की, या प्रकल्पासाठी राज्य शासनाने अर्धा एकर जागेचे १० लाख रुपये अदा केले आहेत. एकूण १० एकर जागा या प्रकल्पासाठी निश्चित करण्यात आली आहे. या केंद्रात दहा कर्मचारी आणि चार शास्त्रज्ञ कार्यरत राहणार असून, २४ तास हवामान अपडेट्स मिळणार आहेत. तसेच, येलो, ऑरेंज आणि रेड अलर्टच्या माध्यमातून संभाव्य आपत्तींची पूर्वसूचना दिली जाणार आहे.
देशातील ४०वे डॉप्लर रडार
सध्या भारतात अशा प्रकारचे ३९ रडार कार्यरत असून, म्हैसमाळ येथील रडार हा देशातील ४०वा डॉप्लर रडार असणार आहे. या रडारसाठी २०२३ पासून प्रक्रिया सुरू होती. आंतरराष्ट्रीय स्तरावर निविदा प्रक्रियेद्वारे हे आधुनिक तंत्रज्ञानयुक्त रडार बसवले जाणार आहे.
कृषी व नागरिकांसाठी महत्त्वपूर्ण सुविधा
या डॉप्लर रडारमुळे ४०० किमी परिघातील ऊन, पाऊस, वादळे, थंडीच्या लाटा आणि विजांच्या गडगडाटाची माहिती नागरिकांना मिळणार आहे. हवामान खात्याचे शास्त्रज्ञ कांबळे यांनी सांगितले की, मोबाइल संदेशाद्वारे नागरिकांना हवामान अपडेट्स मिळतील, त्यामुळे संभाव्य धोके टाळता येतील.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Br29avqYAlRCU4ytjYm4PJ
*जाहिरातीसाठी_संपर्क करा 8329014805*