🚆 वंदे भारत आता नांदेडहून – वेळेच्या बदलाने संभाजीनगरकर प्रवाशांची चांगलीच पंचाईत!

छत्रपती संभाजीनगर : वंदे भारत एक्सप्रेस आता नांदेडपर्यंत वाढवण्यात आली असून, यामुळे परभणी व नांदेडमधील प्रवाशांची सोय झाली आहे. मात्र, या बदलामुळे छत्रपती संभाजीनगरच्या प्रवाशांना मोठी गैरसोय सहन करावी लागणार आहे. गाडी आता नांदेडहून पहाटे ५ वाजता सुटणार असल्याने, संभाजीनगर स्थानकावर तिचे आगमन उशिरा – सकाळी ८.१३ वाजता होणार आहे.

पूर्वी ही गाडी सकाळी ५.४५ वाजता छत्रपती संभाजीनगरहून सुटत होती आणि मुंबईला दुपारपूर्वी पोहोचत होती. त्यामुळे ऑफिससाठी, व्यवसायासाठी आणि शिक्षणासाठी मुंबईला जाणाऱ्या प्रवाशांसाठी ती अत्यंत उपयुक्त होती. परंतु, आता वेळ बदलल्यामुळे कार्यालयीन प्रवास नियोजन डगमगले असून, प्रवाशांमध्ये नाराजीचा सूर आहे.

परतीच्या प्रवासाचे वेळापत्रक मात्र पूर्ववत ठेवण्यात आले आहे. मुंबईहून दुपारी १.१० वाजता सुटणारी गाडी सायंकाळी ७.०५ वाजता छत्रपती संभाजीनगरला पोहोचेल. पुढे जालना, परभणीमार्गे रात्री १०.५० वाजता नांदेडमध्ये अंतिम थांबा असेल.

रेल्वे विभागाने हे नवीन वेळापत्रक लवकरच लागू होणार असल्याचे सांगितले असून, या बदलामुळे संभाजीनगरहून प्रवास करणाऱ्यांची संख्या घटण्याची शक्यता आहे.

“वंदे भारतसारखी जलद सेवा ही ‘हब टू हब’ शहरांना जोडण्यासाठी असते. छत्रपती संभाजीनगरसारख्या औद्योगिक शहराला सुयोग्य वेळेची रेल्वे मिळणे गरजेचे आहे,” असे मत स्वानंद सोळंके (मराठवाडा रेल्वे कृती समिती) यांनी व्यक्त केले.

शहरासाठी स्वतंत्र व वेळेची सोयीची रेल्वे सुरू करावी, अशी मागणी प्रवाशांतून होऊ लागली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/LUuxEbTCGUGCYza17DWFVv

*जाहिरातीसाठी_संपर्क करा 8329014805*