🚨 जनगणनेत छत्रपती संभाजीनगर महापालिका राज्यात अव्वल; ९५% भागात काम पूर्णत्वाकडे, ५ जूनपर्यंत लक्ष्य पूर्ण होणार!

छत्रपती संभाजीनगर महापालिकेने शहरातील जनगणनेच्या कामात मोठी झेप घेत राज्यात प्रथम क्रमांक पटकावला आहे. गेल्या आठवड्यापर्यंत केवळ ३० टक्के भागात सुरू असलेले जनगणनेचे काम आता ९५ टक्के भागात पोहोचले असून, येत्या ५ जूनपर्यंत संपूर्ण काम पूर्ण होईल, असा विश्वास महापालिका आयुक्त अमोल येडगे यांनी बुधवारी व्यक्त केला.

केंद्र शासनाच्या आदेशानुसार देशभर १ मेपासून जनगणनेच्या कामाला सुरुवात करण्यात आली आहे. त्यानुसार छत्रपती संभाजीनगर शहरातही जनगणनेची प्रक्रिया राबविण्यात येत आहे. सुरुवातीच्या टप्प्यात १ ते १५ मेदरम्यान नागरिकांनी स्वतः अॅपच्या माध्यमातून माहिती भरून स्वगणना केली. त्यानंतर १६ मेपासून महापालिकेच्या कर्मचाऱ्यांकडून प्रत्यक्ष घरोघरी जाऊन घरगणनेचे काम सुरू करण्यात आले.

महापालिकेने शहरात विविध ब्लॉक तयार करून प्रत्येक कर्मचाऱ्यांकडे सुमारे २०० घरांची जबाबदारी दिली होती. मात्र, सुरुवातीच्या आठवड्यात या कामाची गती अत्यंत मंद होती. ही बाब लक्षात घेत आयुक्त अमोल येडगे यांनी रविवारी मौलाना आझाद संशोधन केंद्रात अधिकारी आणि कर्मचाऱ्यांची विशेष बैठक घेतली. बैठकीत कामात हलगर्जीपणा करणाऱ्यांवर कठोर कारवाईचा इशारा देण्यात आला. काम सुरू न करणाऱ्यांवर गुन्हे दाखल करण्याची चेतावणीही देण्यात आली होती.

यानंतर जनगणनेच्या कामात मोठी गती आल्याचे दिसून आले. सध्या शहरातील ९५ टक्के भागात जनगणनेचे काम सुरू असून, राज्यातील महापालिकांमध्ये छत्रपती संभाजीनगर महापालिका अव्वल ठरली आहे. काही कर्मचाऱ्यांनी आठवडाभरातच २०० हून अधिक घरांचे काम पूर्ण केल्याने त्यांच्या कार्याचा गौरव करण्यात आला आहे.

दरम्यान, कामात हलगर्जीपणा करणाऱ्या कर्मचाऱ्यांना नोटिसा बजावण्यात आल्या असून, त्यांच्या खुलाशांची तपासणी सुरू आहे. आरोग्यविषयक गंभीर कारणे असणाऱ्यांना सवलत दिली जाणार असली तरी समाधानकारक कारण नसल्यास कारवाई अटळ असल्याचे आयुक्तांनी स्पष्ट केले.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*