छत्रपती संभाजीनगर : कॉकरोच जनता पार्टीचे संस्थापक अभिजीत दिपके यांचे रविवारी पहाटे छत्रपती संभाजीनगर शहरात आगमन झाले. त्यांच्या आगमनाच्या पार्श्वभूमीवर पोलिस प्रशासनाने वाळूज महानगर परिसरात कडेकोट बंदोबस्त तैनात केला होता. कोणताही अनुचित प्रकार घडू नये तसेच कायदा व सुव्यवस्था अबाधित राहावी यासाठी वरिष्ठ पोलीस अधिकाऱ्यांसह मोठा पोलीस फौजफाटा परिसरात तैनात करण्यात आला होता.
अभिजीत दिपके हे नुकतेच अमेरिकेहून भारतात परतले असून, त्यांनी ६ जून रोजी दिल्लीतील जंतरमंतर येथे केंद्रीय शिक्षणमंत्री Dharmendra Pradhan यांच्या राजीनाम्याच्या मागणीसाठी आंदोलन केले होते. या आंदोलनाची विविध स्तरांवर चर्चा झाली होती. आंदोलनाचा कालावधी पूर्ण झाल्यानंतर त्यांनी दिल्लीहून थेट छत्रपती संभाजीनगर गाठले.
पहाटे शहरात दाखल झाल्यानंतर दिपके आपल्या वाळूज महानगर येथील निवासस्थानी पोहोचले. त्यांच्या आगमनाची माहिती मिळताच समर्थक, कार्यकर्ते आणि नातेवाईकांनी मोठ्या संख्येने परिसरात गर्दी केली. अनेकांनी त्यांचे पुष्पगुच्छ देऊन स्वागत केले, तर काही समर्थकांनी घोषणाबाजी करत आपला उत्साह व्यक्त केला. यावेळी परिसरात काही काळ उत्सुकतेचे वातावरण निर्माण झाले होते.
पोलिस प्रशासनाने परिस्थितीवर बारकाईने लक्ष ठेवले होते. वरिष्ठ अधिकाऱ्यांनी स्वतः घटनास्थळी उपस्थित राहून सुरक्षा व्यवस्थेचा आढावा घेतला. नागरिकांना कोणताही त्रास होऊ नये तसेच वाहतुकीवर परिणाम होऊ नये यासाठी विशेष नियोजन करण्यात आले होते. पोलिसांच्या दक्षतेमुळे संपूर्ण कार्यक्रम शांततेत पार पडला.
दरम्यान, अभिजीत दिपके यांच्या पुढील राजकीय आणि सामाजिक भूमिकेबाबत त्यांच्या समर्थकांमध्ये उत्सुकता असून, आगामी काळात ते विविध विषयांवर आपली भूमिका मांडणार असल्याची चर्चा राजकीय वर्तुळात सुरू आहे. त्यांच्या छत्रपती संभाजीनगरातील आगमनामुळे शहरातील राजकीय वातावरण पुन्हा एकदा चर्चेत आले आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/I6kWaCT1EMB7py0eVHlGdl
*जाहिरातीसाठी_संपर्क करा 8329014805*