ATM Loot in Chhatrapati Sambhajinagar: ₹13.92 Lakh Stolen in Just 6 Minutes
छत्रपती संभाजीनगरच्या वाळूज पोलिस ठाण्याच्या हाकेच्या अंतरावर असलेल्या अॅक्सिस बँकेचे एटीएम चोरट्यांनी फोडले. सीसीटीव्ही कॅमेऱ्यावर काळा स्प्रे मारून चार चोरट्यांनी अवघ्या ६ मिनिटांत गॅस कटरच्या साहाय्याने एटीएम फोडत १३ लाख ९२ हजार ५०० रुपये लंपास केले. शनिवारी मध्यरात्री पावणेदोनच्या सुमारास बकवालनगर भागात हा प्रकार घडला.
बकवालनगरजवळ अॅक्सिस बँकेचे एटीएम आहे. या भागात मोठ्या कंपन्या आणि नागरी वसाहती असल्याने येथे नेहमी वर्दळ असते. त्यामुळे मशीनमध्ये मोठ्या प्रमाणात रोकड असते. शनिवारी मध्यरात्री १.४७ वाजता चोरटे एटीएममध्ये घुसले. एकाने सीसीटीव्ही कॅमेऱ्यावर काळा स्प्रे मारला. त्यानंतर गॅस कटरच्या साहाय्याने मशीन फोडून रोकड लंपास केली.
चोरीदरम्यान ना सायरन वाजला, ना अलार्म! त्यामुळे बँकेची सुरक्षा यंत्रणा निकामी झाली का? असा प्रश्न उपस्थित होत आहे. विशेष म्हणजे, चोरीची संपूर्ण घटना सीसीटीव्हीत कैद झाली आहे. मात्र, चोरट्यांनी आधीच कॅमेऱ्यावर स्प्रे मारल्यामुळे त्यांची ओळख पटवणे कठीण ठरत आहे.
या घटनेनंतर चोरट्यांचा शोध सुरू आहे. पोलिसांनी परिसरातील इतर सीसीटीव्ही फुटेज ताब्यात घेतले आहेत. हा प्रकार घडला तेव्हा पोलिस ठाणे केवळ काही अंतरावर होते, त्यामुळे सुरक्षेच्या दृष्टीने हा मोठा गाफीलपणा असल्याचे बोलले जात आहे.
बँकेच्या अधिकाऱ्यांनी चोरीचा अहवाल पोलिसांना दिला असून, तपास वेगाने सुरू असल्याचे पोलिसांनी सांगितले.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/CUZxUMpm5nG0dcievrzNlr
*जाहिरातीसाठी_संपर्क करा 8329014805*