🚜 पडेगाव-दौलताबाद रस्ता रुंदीकरणाला वेग! सकाळपासून पाडापाडीची जोरदार कारवाई

छत्रपती संभाजीनगर: रस्ता रुंदीकरण मोहिमेंतर्गत गुरुवार, दि. ३ जुलै रोजी महापालिकेने पढेगाव ते दौलताबाद टी-पॉइंटदरम्यान पाडापाडी कारवाईला सकाळी ८ वाजल्यापासूनच सुरुवात केली आहे.  महापालिकेचे अतिक्रमण विरोधी पथक, नगररचना विभागाचे अधिकारी व कर्मचारी तसेच पोलीस मोठ्या संख्येने तैनात करण्यात आले आहे. बुधवारी दिवसभर नगररचना विभागाने बाधित मालमत्तांवर मार्किंग केले होते आणि बहुतांश मालमत्ताधारकांनी स्वतःहून अनधिकृत बांधकाम हटवण्यास सुरुवात केली होती.

शहर विकास आराखड्यानुसार पडेगाव ते दौलताबाद टी-पॉइंट दरम्यानचा रस्ता ६० मीटर म्हणजेच १९६ फूट रुंद प्रस्तावित आहे. या रस्त्यावर ढाबे, हॉटेल्स, नाष्टा केंद्रे, चहा स्टॉल, किराणा व इतर दुकाने मोठ्या प्रमाणात आहेत. निवासी मालमत्ता तुलनेत फारच कमी असून, बऱ्याच मालमत्ताधारकांकडे जमिनीचे मालकी हक्काचे दस्तऐवज आहेत. त्यामुळे बाधित भागाचा मोबदला टीडीआरच्या स्वरूपात द्यावा, अशी मागणी संबंधितांनी केली आहे.

महापालिकेने मंगळवारपासून या भागात भोंग्याद्वारे जनजागृती करत पूर्वसूचना दिली होती. स्मशानभूमीपासून सुरू झालेल्या मोजणीच्या प्रक्रियेत आतापर्यंत सुमारे ३ किमी अंतरापर्यंत मार्किंग पूर्ण झाले असून, उर्वरित अंतराचे मार्किंग आज पूर्ण करण्यात येईल.  सकाळपासून सुरू झालेल्या कारवाईत अनधिकृत बांधकामे जमीनदोस्त करण्यात येत असून, शहरातील वाहतूक व्यवस्था सुलभ करण्याच्या दृष्टीने हा महत्त्वपूर्ण टप्पा मानला जात आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/BQJO3GSQlZh881t2Q5PQXa?mode=r_c

*जाहिरातीसाठी_संपर्क करा 8329014805*