छत्रपती संभाजीनगर : शहर स्वच्छ व सुंदर ठेवण्याच्या उद्देशाने छत्रपती संभाजीनगर महापालिकेने एक मोठा आणि ठोस निर्णय घेतला आहे. शहरातील प्रत्येक व्यावसायिक दुकानासमोर डस्टबिन असणे बंधनकारक करण्यात आले असून, नियम मोडणाऱ्या व्यापाऱ्यांवर आता थेट ५,००० रुपयांचा दंड आकारण्यात येणार आहे.
सध्या शहरात रस्ता रुंदीकरणाची मोहीम सुरू असून, त्यामुळे महापालिकेच्या कारवाईची धास्ती व्यापाऱ्यांमध्ये आहे. याच पार्श्वभूमीवर स्वच्छतेच्या दृष्टीनेही महापालिका आता अधिक सक्त आणि परिणामकारक पावले उचलत आहे. घनकचरा व्यवस्थापन विभागाने स्पष्टपणे सांगितले आहे की कोणतेही दुकान डस्टबिनशिवाय आढळल्यास संबंधित व्यापाऱ्यावर दंडात्मक कारवाई केली जाईल.
फक्त दुकानदार नव्हे, तर सामान्य नागरिकांनीही सार्वजनिक ठिकाणी, दुभाजकात किंवा चौकात कचरा टाकल्यास त्यांच्यावरही दंड आकारला जाणार आहे. या कारवाईसाठी स्वच्छता निरीक्षकांना थेट दंड आकारण्याचे अधिकार देण्यात आले आहेत.
यासोबतच शहरातून ‘सिंगल युज प्लास्टिक’वर पूर्णतः बंदी घालण्यात आली आहे. व्यापाऱ्यांनी प्लास्टिकऐवजी पर्यावरणपूरक पिशव्या वापरण्याचे आवाहन महापालिकेने केले आहे.
या मोहिमेची अंमलबजावणी महानगरपालिका उपायुक्त नंदकिशोर भोंबे यांच्या नेतृत्वाखाली सुरू आहे. शहरातील सर्व १० झोनमध्ये ‘स्वच्छता निरीक्षक’ आणि ‘नागरी मित्र पथक’ – ज्यामध्ये माजी सैनिकांचा समावेश आहे – यांना कारवाईची जबाबदारी देण्यात आली आहे.
महापालिकेने नागरिकांना स्वच्छतेबाबत अधिक जागरूक व्हावे, तसेच नियमांचे पालन करून शहर स्वच्छ आणि सुंदर ठेवण्यास हातभार लावावा, असे आवाहन केले आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/HxCi3XB18w2Dvq8ojRc05z?mode=ac_c
*जाहिरातीसाठी_संपर्क करा 8329014805*