🌊 आज गणरायांचा विसर्जन सोहळा : संभाजीनगरकर भक्तिभाव आणि उत्साहात देणार निरोप 🌊

छत्रपती संभाजीनगर : गणेश चतुर्थीच्या (दि.२७) दिवशी वाजत-गाजत, ढोल-ताशांच्या गजरात गणेशभक्तांनी आपल्या लाडक्या बाप्पाची स्थापना केली होती. दहा दिवसांपासून घराघरात, मंडळांमध्ये भक्तिभावाने गणेशोत्सव साजरा झाला. आज (शनिवार, दि.६) अनंत चतुर्दशीच्या दिवशी गणेशभक्त आपल्या बाप्पाला भावपूर्ण निरोप देत आहेत. सकाळपासूनच शहरात उत्साहाचे वातावरण असून, “गणपती बाप्पा मोरया, पुढच्या वर्षी लवकर या” या गजराने गल्लीबोळ दुमदुमत आहेत.

गणेश विसर्जन सुरळीत पार पडावे यासाठी महापालिकेने मोठी तयारी केली आहे. शहरात दीड हजार कर्मचारी नियुक्त करण्यात आले असून, सकाळी ९ वाजल्यापासून ते शेवटचा गणपती विसर्जित होईपर्यंत हे कर्मचारी कार्यरत राहणार आहेत. चार फूट उंचीपर्यंतच्या गणेश मूर्तींसाठी कृत्रिम तलाव व सार्वजनिक विहिरींमध्ये विसर्जनाची व्यवस्था केली आहे. तर चार फुटांपेक्षा उंच मूर्तींच्या विसर्जनाची जबाबदारी संबंधित गणेश मंडळांनी पार पाडायची आहे, असे मनपा आयुक्त तथा प्रशासक जी. श्रीकांत यांनी सांगितले.

राजाबाजार येथील संस्थान गणपती मंदिरातून सकाळी ११ वाजता विसर्जन मिरवणुकीस सुरुवात झाली. पारंपरिक पद्धतीने ढोल-ताशा, लेझीम पथक आणि भजनी मंडळांच्या गजरात भव्य मिरवणुका शहरातून मार्गक्रमण करत आहेत. नागरिकांना त्रास होऊ नये म्हणून महापालिकेकडून विहीर, तलाव, कृत्रिम तलाव या ठिकाणी अधिकारी, आरोग्य कर्मचारी पथक, जीवरक्षक तसेच सुरक्षा व्यवस्था तैनात करण्यात आली आहे.

याशिवाय शहरातील विविध भागांत ४१ मूर्ती संकलन केंद्रे उभारण्यात आली असून, पर्यावरणपूरक विसर्जनाला प्रोत्साहन दिले जात आहे. गणेशोत्सवाची सांगता जरी होत असली तरी भक्तांच्या मनात उत्साह, भक्ती आणि भावनांचे वारे जोरात वाहत आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/INIt76ceHKUABNJR2KWGnv?mode=ems_copy_c

*जाहिरातीसाठी_संपर्क करा 8329014805*