🚨 जिल्हाधिकारी कार्यालयात अतिरेकी हल्ला प्रतिकार प्रात्यक्षिक; सुरक्षेसाठी प्रशासनाची सज्जता 🚨

छत्रपती संभाजीनगर : जिल्हा आपत्ती व्यवस्थापन प्राधिकरणाच्या वतीने जिल्हाधिकारी कार्यालयात अतिरेकी हल्ल्याचा प्रतिकार करण्यासाठी आज (सोमवार) सकाळी विशेष प्रात्यक्षिक सराव घेण्यात आला. वाढत्या सुरक्षेच्या धोक्यांच्या पार्श्वभूमीवर आपत्तीजनक परिस्थितीला तोंड देण्यासाठी प्रशासन आणि पोलीस दल नेहमीच सज्ज राहावे, या उद्देशाने हा सराव आयोजित करण्यात आला.

सकाळी १० ते १२ या वेळेत प्रत्यक्ष सरावाचे थरारक दृश्य जिल्हाधिकारी कार्यालय परिसरात पाहायला मिळाले. या सरावात अतिरेक्यांचा हल्ला, दडून बसलेल्या अतिरेक्यांचा शोध, ओलीस ठेवलेल्या नागरिकांची सुटका, तसेच अतिरेक्यांना पकडून पोलिसांच्या ताब्यात देणे या प्रक्रियांचा अभ्यास करण्यात आला.

जलद प्रतिसाद दलाचे पीएसआय सतीश दिंडे यांच्या नेतृत्वाखाली २२ कमांडो सहभागी झाले होते. त्याचबरोबर कमांडो प्रशिक्षक आकाश घोडके, अजिंक्य गाजरे, तसेच बॉम्ब शोधक व नाशक पथकाचे एक अधिकारी आणि सात अंमलदार, १३ कमांडो उपस्थित होते. या सर्वांनी मिळून आपत्तीजनक परिस्थितीत कोणती कार्यपद्धती अवलंबायची, याचा सराव प्रत्यक्ष कृतीतून सादर केला.

या सरावावेळी जिल्हाधिकारी दिलीप स्वामी, अपर जिल्हाधिकारी संभाजीराव अडकुर्णे आणि निवासी उपजिल्हाधिकारी जनार्दन विधाते यांनी प्रत्यक्ष उपस्थित राहून संपूर्ण प्रात्यक्षिकाचे निरीक्षण केले. जिल्हा आपत्ती व्यवस्थापन अधिकारी मारुती म्हस्के यांनी या सरावाची माहिती दिली.

अशा प्रकारच्या प्रात्यक्षिकांमुळे प्रशासन, पोलीस दल आणि संबंधित यंत्रणांची सज्जता अधिक मजबूत होत असून, नागरिकांच्या सुरक्षेच्या दृष्टीने हा सराव महत्त्वपूर्ण ठरला आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IlPqAw1ds5NJ1KgrzA4SQ8?mode=ems_copy_c

*जाहिरातीसाठी_संपर्क करा 8329014805*