🚍 नाथषष्ठी आणि सैलानी बाबा उरुसासाठी एसटीची विशेष तयारी; १४० जादा बस धावणार

छत्रपती संभाजीनगर : पैठण येथे संत एकनाथ महाराज यांच्या नाथषष्ठीनिमित्त दरवर्षीप्रमाणे यंदाही लाखो भाविकांची उपस्थिती अपेक्षित आहे. ८ मार्च रोजी होणाऱ्या या सोहळ्यासाठी भाविकांची गैरसोय टाळण्यासाठी महाराष्ट्र राज्य मार्ग परिवहन महामंडळ (एसटी) प्रशासनाने विशेष नियोजन केले आहे. ६ मार्च ते १६ मार्च या कालावधीत छत्रपती संभाजीनगर शहरातून तब्बल ८० जादा बस सोडण्यात येणार आहेत.

छत्रपती संभाजीनगर मध्यवर्ती बसस्थानक आणि सिडको बसस्थानक येथून पैठणकडे दर ३० मिनिटांनी बस उपलब्ध होणार आहे. भाविकांची संख्या लक्षात घेऊन आवश्यकतेनुसार आणखी बसची सोय करण्यात येईल, अशी माहिती विभागीय नियंत्रक प्रमोद नेहुल यांनी दिली. नाथषष्ठी (फाल्गुन वद्य षष्ठी) निमित्त पैठण येथे मोठ्या उत्साहात धार्मिक कार्यक्रम होतात. त्यामुळे राज्यभरातून येणाऱ्या भाविकांची संख्या मोठी असते.

भाविकांच्या प्रवासात कोणतीही अडचण निर्माण होऊ नये यासाठी २२ स्वतंत्र कर्मचाऱ्यांची नियुक्ती पैठण येथे करण्यात येणार आहे. हे कर्मचारी बसचे नियोजन, प्रवाशांना मार्गदर्शन तसेच अतिरिक्त बसची आवश्यकता भासल्यास तात्काळ वरिष्ठ कार्यालयाला माहिती देण्याचे काम पाहणार आहेत. त्यामुळे गर्दीच्या काळातही वाहतूक सुरळीत ठेवण्याचा प्रयत्न केला जाणार आहे.

दरम्यान, बुलडाणा जिल्ह्यातील पिंपळगाव सराय येथे हजरत खैरुद्दीन सैलानी बाबा यांच्या उरुसानिमित्तही एसटी प्रशासनाने ६० जादा बसचे नियोजन केले आहे. ८ मार्च रोजी होणाऱ्या या उरुसासाठी सिल्लोड आणि सोयगाव येथून विशेष बस सोडण्यात येणार आहेत.

एकूणच नाथषष्ठी आणि सैलानी बाबा उरुस या दोन्ही धार्मिक सोहळ्यांसाठी एसटी प्रशासन सज्ज झाले असून भाविकांना सुरक्षित, सोयीस्कर आणि वेळेवर प्रवासाची सुविधा उपलब्ध करून देण्याचा प्रयत्न करण्यात येत आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IdBhTvB8DI79n97XfExNI9?mode=gi_t

*जाहिरातीसाठी_संपर्क करा 8329014805*