🚨 गोवंश कत्तलीचा प्रयत्न उधळला; वाळूज पोलिसांची धडक कारवाई, ९ गायींची सुटका

छत्रपती संभाजीनगर : वाळूज पोलिसांनी अवैध गोवंश कत्तलीचा मोठा प्रयत्न उधळून लावत नऊ गायींची सुटका केली असून या प्रकरणी दोन आरोपींविरोधात गुन्हा दाखल करण्यात आला आहे. ही कारवाई पोलिस आयुक्तांच्या आदेशानुसार वाळूज पोलिस ठाण्याच्या पथकाने आज रविवारी (दि. 24 मे) रोजी केली. या कारवाईमुळे परिसरात खळबळ उडाली आहे.

मिळालेल्या माहितीनुसार, वाळूज पोलिसांना गुप्त माहिती मिळाली होती की, नारायणपूर परिसरातील स्मशानभूमीजवळील एका जुन्या वाड्यात गोवंश कत्तल केली जात आहे. या माहितीच्या आधारे पोलिस उपनिरीक्षक रमेश राठोड यांच्या नेतृत्वाखालील पथकाने घटनास्थळी छापा टाकला. तेव्हा पोलिसांना एका बंदिस्त जुन्या वाड्यात संशयास्पद हालचाली दिसून आल्या.

पोलिसांनी आत जाऊन पाहणी केली असता, त्या ठिकाणी जनावरे कापण्यासाठी वापरले जाणारे साहित्य, हत्यारे, मीठ तसेच पाण्याने भरलेले ड्रम आढळून आले. यावेळी एकूण नऊ जिवंत गायी पोलिसांना मिळून आल्या. या गायी कत्तलीच्या उद्देशाने बांधून ठेवण्यात आल्याची माहिती समोर आली आहे.

या प्रकरणी पोलिसांनी मोसिन बशीर शेख (वय 23, रा. पंढरपूर, ता. छत्रपती संभाजीनगर) याला ताब्यात घेतले असून दुसऱ्या आरोपीचा शोध सुरू आहे. आरोपींविरुद्ध वाळूज पोलिस ठाण्यात गुन्हा दाखल करण्यात आला आहे.

दरम्यान, पोलिसांनी सर्व गायींची सुटका करून त्यांना गोशाळेत दाखल केले आहे. पुढील तपास पोलिस उपनिरीक्षक रमेश राठोड करीत आहेत. तसेच नागरिकांनी अवैध गोवंश वाहतूक, तस्करी किंवा कत्तलीबाबत माहिती मिळाल्यास तात्काळ पोलिसांशी संपर्क साधण्याचे आवाहन वाळूज पोलिसांनी केले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*