🚨 छत्रपती संभाजीनगरात दुचाकी चोरी करणाऱ्या टोळीचा पर्दाफाश; गुन्हे शाखेच्या सापळ्यात त्रिकूट जेरबंद, ४ चोरीच्या दुचाकी जप्त

छत्रपती संभाजीनगर :  शहरात वाढत्या दुचाकी चोरीच्या घटनांमुळे नागरिकांमध्ये भीतीचे वातावरण निर्माण झाले असताना, गुन्हे शाखेच्या पथकाने मोठी कारवाई करत दुचाकी चोरणाऱ्या त्रिकूटाला अटक केली आहे. रविवारी छावणी परिसरात ही कारवाई करण्यात आली असून आरोपींकडून चार चोरीच्या दुचाकी जप्त करण्यात आल्या आहेत. या प्रकरणामुळे शहरातील विविध पोलिस ठाण्यांमध्ये दाखल असलेल्या चोरीच्या गुन्ह्यांचा उलगडा झाला आहे.

अटक करण्यात आलेल्या आरोपींमध्ये विशाल प्रभू सोनवणे (१९, मूळ रा. मलकापूर, ता. भोकरदन), गिरीश मनोज बेलदार (१९, मूळ रा. बेरी बुद्रूक, ता. जामनेर, जि. जळगाव) आणि शशांक संतोष कांबळे (२३, रा. भीमनगर, भावसिंगपुरा) यांचा समावेश आहे. विशाल आणि गिरीश हे दोघेही सध्या पडेगाव येथे राहत असून पोलिस व लष्करी भरतीची तयारी करत असल्याची माहिती समोर आली आहे.

गुन्हे शाखेला माहिती मिळाली होती की, छावणी परिसरातील मैदानात काही युवक चोरीच्या दुचाकी विक्रीसाठी येणार आहेत. त्यानुसार पोलिसांनी सापळा रचत तिघांना विनानंबर प्लेटच्या गाड्यांसह ताब्यात घेतले. सुरुवातीला आरोपींनी उडवाउडवीची उत्तरे दिली. मात्र पोलिसी चौकशीत त्यांनी बीबी का मकबरा परिसरातून दोन, रेल्वे स्टेशन परिसरातून एक आणि भोकरदन येथून एक अशा चार दुचाकी चोरल्याची कबुली दिली.

विशेष म्हणजे, सुरुवातीला विशालने स्वतःसाठी एक दुचाकी चोरली होती. त्यानंतर जलद पैसे कमावण्याच्या उद्देशाने त्याने गिरीश आणि नंतर शशांकला सोबत घेत दुचाकी चोरीचे रॅकेट सुरू केले. चोरीनंतर ग्राहक मिळत नसल्याने त्यांनी छावणी भागातील निर्जन ठिकाणी दुचाकी लपवून ठेवल्या होत्या.

ही कारवाई वरिष्ठ पोलिस निरीक्षक गजानन कल्याणकर यांच्या मार्गदर्शनाखाली उपनिरीक्षक प्रवीण वाघ व त्यांच्या पथकाने केली. पुढील तपासासाठी आरोपींना बेगमपुरा पोलिसांच्या ताब्यात देण्यात आले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी  खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*