🚨 पानटपऱ्या, बिअर शॉपी फोडणाऱ्या टोळीचा पर्दाफाश; गुन्हे शाखेची धडक कारवाई, लाखोंचा मुद्देमाल जप्त 🚔

छत्रपती संभाजीनगर : शहरातील पानटपऱ्या, बिअर शॉपी आणि किराणा दुकाने फोडून चोरी करणाऱ्या टोळीचा गुन्हे शाखेने पर्दाफाश करत दोन आरोपींना अटक केली आहे. निसार अहेमद गफार पठाण उर्फ सलमान दुल्हन आणि गणेश शामराव सदावर्ते अशी अटक करण्यात आलेल्या आरोपींची नावे आहेत. आरोपींकडून तब्बल 3 लाख 71 हजार 927 रुपयांचा मुद्देमाल जप्त करण्यात आला असून त्यात सीसीटीव्ही कॅमेरे, विदेशी दारूच्या बाटल्या, सिगारेट पाकिटे, चोरीसाठी वापरण्यात आलेली हत्यारे तसेच दोन वाहनांचा समावेश आहे.

शहरातील विविध भागांत रात्रीच्या वेळी दुकाने फोडून चोरीच्या घटना वाढल्याने गुन्हे शाखेने विशेष तपास मोहीम हाती घेतली होती. तांत्रिक तपास, सीसीटीव्ही फुटेज आणि गोपनीय माहितीच्या आधारे पोलिसांनी आरोपींचा माग काढला. चौकशीत आरोपींनी अनेक चोरीच्या गुन्ह्यांची कबुली दिल्याचे पोलिसांनी सांगितले.

प्राथमिक तपासात सिटी चौक, जिन्सी आणि सिडको पोलीस ठाण्यांच्या हद्दीतील एकूण सात चोरीचे गुन्हे उघडकीस आले आहेत. या कारवाईमुळे व्यापाऱ्यांमध्ये समाधान व्यक्त करण्यात येत असून आणखी काही गुन्ह्यांचा उलगडा होण्याची शक्यता पोलिसांनी व्यक्त केली आहे. ही कारवाई गुन्हे शाखेच्या विशेष पथकाने केली.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*