🚨 “तुम्हाला ६० हजारांची लॉटरी लागली” म्हणत वृद्धेला गंडा; बोलण्यात गुंतवून ७० हजारांच्या सोन्याच्या बांगड्या घेऊन दुचाकीस्वार फरार

छत्रपती संभाजीनगर : शहरात पुन्हा एकदा लॉटरीचे आमिष दाखवत फसवणुकीचा प्रकार समोर आला असून, एका वृद्ध महिलेच्या सोन्याच्या बांगड्या लंपास करण्यात आल्याची घटना सिडको परिसरात घडली आहे. या प्रकरणी सिडको पोलीस ठाण्यात अज्ञात इसमाविरोधात फसवणूक आणि विश्वासघाताचा गुन्हा दाखल करण्यात आला असून पोलीस आरोपीचा शोध घेत आहेत.

पोलिसांकडून मिळालेल्या माहितीनुसार, इंदुबाई दगडुशेट वाणी (वय ६५, रा. बजरंग चौक, एन-७) या सोमवारी (२६ मे) सकाळी साडेसहा वाजेच्या सुमारास बजरंग चौक येथील महाराष्ट्र बँकेजवळील परिसरातून पायी जात होत्या. यावेळी एका दुचाकीस्वार अज्ञात इसमाने त्यांना गाठले. “तुम्हाला लॉटरी लागली असून ६० हजार रुपये मिळणार आहेत,” असे सांगत त्याने महिलेला विश्वासात घेतले. सुरुवातीला महिलेला संशय आला नाही. आरोपीने गोड बोलून महिलेशी संवाद साधत त्यांना आपल्या जाळ्यात ओढले.

यानंतर आरोपीने महिलेला दुचाकीवर बसवून जाधववाडी परिसरातील सनी सेंटर तसेच शेख क्लिनिक परिसरात नेले. “तुमच्या बांगड्यांचे वजन करून आणतो,” असे सांगत आरोपीने त्यांच्या हातातील दोन सोन्याच्या बांगड्या घेतल्या. काही वेळाने परत येतो असे सांगून तो घटनास्थळावरून पसार झाला. बराच वेळ आरोपी परत न आल्याने आपली फसवणूक झाल्याचे महिलेच्या लक्षात आले.

या प्रकारात सुमारे ३० ग्रॅम वजनाच्या दोन सोन्याच्या बांगड्या, अंदाजे ७० हजार रुपयांचा ऐवज आरोपीने लंपास केला आहे. घटनेनंतर महिलेने सिडको पोलीस ठाण्यात धाव घेत तक्रार दिली. पोलिसांनी अज्ञात इसमाविरोधात गुन्हा दाखल केला असून परिसरातील सीसीटीव्ही फुटेजच्या आधारे आरोपीचा शोध सुरू आहे. नागरिकांनी अनोळखी व्यक्तींच्या आमिषाला बळी पडू नये, असे आवाहन पोलिसांकडून करण्यात आले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*