🚨 खोट्या गुन्ह्याची धमकी देत व्यावसायिकाकडून खंडणी उकळण्याचा प्रयत्न; ३० हजार ऑनलाइन घेताच पोलिसांनी केला गुन्हा दाखल

छत्रपती संभाजीनगर : खोटा गुन्हा दाखल करून तुरुंगात टाकण्याची धमकी देत एका व्यावसायिकाकडून ५० हजार रुपयांची खंडणी उकळण्याचा धक्कादायक प्रकार समोर आला आहे. या प्रकरणात सिटी चौक पोलिसांनी एका महिलेसह तिघांविरुद्ध गुन्हा दाखल केला असून पुढील तपास सुरू आहे. ही घटना २३ ते २५ मे दरम्यान औरंगपुरा परिसरात घडली.

फय्याज शेख इब्राहीम यांचे औरंगपुरा भाजी मंडई परिसरात ‘महाराष्ट्र इलेक्ट्रिकल्स’ नावाचे गॅस शेगडी दुरुस्तीचे दुकान आहे. २३ मे रोजी आरोपी महिला ज्योती जगधणे हिने त्यांच्या दुकानातून गॅस शेगडी दुरुस्त करून घेतली होती. दुरुस्तीचे ४२० रुपये तिने ऑनलाइन पद्धतीने दिले. मात्र त्याच रात्री ती गणेश शिंदे याच्यासोबत पुन्हा दुकानात आली. “तू दुकानात अवैध गॅस रिफिलिंग करतोस. पोलिसांत तक्रार करून तुला जेलमध्ये पाठवू,” अशी धमकी देत त्यांनी फय्याज यांच्याकडे ५० हजार रुपयांची मागणी केली. तसेच दुकान सुरू ठेवायचे असेल तर दरमहा १५ हजार रुपये हप्ता द्यावा लागेल, अशी अटही घातली.

घाबरलेल्या फय्याज यांनी सिटी चौक पोलिस ठाण्यात धाव घेत तक्रार दाखल केली. त्यानंतर पोलिसांनी सापळा रचला. मंगळवारी सकाळी गणेश शिंदे याने पुन्हा पैशांसाठी फोन केला. पोलिसांच्या मार्गदर्शनाखाली फय्याज आणि त्यांच्या भावाने आरोपींशी चर्चा केली. “सध्या ३० हजार रुपये देतो, उर्वरित २० हजार रुपये ईदनंतर देतो,” असे सांगून व्यवहार ठरवण्यात आला.

आरोपींनी दिलेल्या मोबाइल क्रमांकावर पैसे पाठवण्यास सांगितले. पोलिसांनी आधी खात्री करण्यासाठी ‘फोन पे’वरून एक रुपया पाठवला. व्यवहार यशस्वी झाल्याची खात्री होताच पोलिसांच्या उपस्थितीत ३० हजार रुपये ऑनलाइन ट्रान्सफर करण्यात आले. पैसे मिळाल्यानंतर आरोपींकडून ‘थँक यू’ असा संदेशही पाठवण्यात आला. हा संपूर्ण व्यवहार पोलिसांनी पंचनाम्यात नोंदवून घेतला असून सहायक पोलिस निरीक्षक मनीषा हिवराळे या प्रकरणाचा तपास करत आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*