छत्रपती संभाजीनगर : शहरातील गारखेडा परिसरात किरकोळ वादातून एका तरुणाला जीव गमवावा लागल्याची धक्कादायक घटना समोर आली आहे. साईनगर भागात नात्यातील तरुणीशी बोलत असल्याच्या कारणावरून झालेल्या वादाचे रूपांतर रक्तरंजित हल्ल्यात झाले. या घटनेत १९ वर्षीय तौसिफ शमीम शेख याचा मृत्यू झाला असून, या प्रकरणातील आरोपी आदित्य अशोक शेळके याला पोलिसांनी ताब्यात घेतले आहे.
मिळालेल्या माहितीनुसार, तौसिफ आणि आरोपी आदित्य एकाच परिसरात राहत होते. बुधवारी, १४ ऑक्टोबर रोजी रात्री सुमारे ११ वाजण्याच्या सुमारास तौसिफ साईनगर भागात नात्यातील एका तरुणीशी संवाद साधत होता. यावेळी आदित्यने त्याच्याकडे याबाबत विचारणा केली. तरुणीशी बोलण्यावरून दोघांमध्ये शाब्दिक वाद सुरू झाला. हा वाद वाढत गेल्याने परिस्थिती हाताबाहेर गेली.
रागाच्या भरात आरोपीने चाकूने तौसिफवर हल्ला केल्याचे पोलिसांनी सांगितले. त्याच्या छातीसह नाक आणि डोक्याच्या भागावर वार झाल्याने तो गंभीर जखमी झाला. घटनेनंतर त्याला तातडीने रुग्णालयात नेण्यात आले; मात्र उपचारादरम्यान त्याचा मृत्यू झाला. या घटनेमुळे परिसरातील नागरिकांमध्ये भीतीचे वातावरण निर्माण झाले.
पोलिसांकडून तपासाला वेग
घटनेची माहिती मिळताच स्थानिक पोलिसांनी घटनास्थळी धाव घेतली. सहायक पोलिस आयुक्त मनीष कल्याणकर आणि पोलिस निरीक्षक राजेंद्र मुंडे यांच्यासह अधिकाऱ्यांनी घटनास्थळाची पाहणी केली. सुरुवातीला आरोपी घटनास्थळावरून निघून गेला होता. त्यानंतर पोलिसांनी तपासाची दिशा निश्चित करत त्याचा शोध घेतला आणि आदित्य शेळके याला ताब्यात घेतले.
या प्रकरणात आरोपीला आज न्यायालयात हजर करण्यात येणार असून हत्येमागील नेमकी परिस्थिती आणि घटनेशी संबंधित इतर बाबींचा तपास पोलिस करत आहेत.
किरकोळ कारणावरून सुरू झालेला वाद एका तरुणाच्या मृत्यूला कारणीभूत ठरल्याने परिसरात हळहळ व्यक्त होत आहे. रागाच्या भरात घेतलेला निर्णय किती गंभीर परिणाम घडवू शकतो, हे या घटनेतून पुन्हा समोर आले आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/CF89MLzjXiJLRGIbwDr7te
*जाहिरातीसाठी_संपर्क करा 8329014805*