छत्रपती संभाजीनगर : पुण्याहून नागपूरकडे निघालेला प्रवास केंब्रिज चौकात प्रवाशांसाठी काळरात्र ठरला. शहरातील केंब्रिज चौकाजवळ खासगी ट्रॅव्हल्सचा भीषण अपघात होऊन बस थेट पुलाखाली कोसळली. अचानक घडलेल्या या दुर्घटनेने परिसरात एकच गोंधळ उडाला. या अपघातात एका प्रवाशाचा जागीच मृत्यू झाला असून, २० पेक्षा अधिक प्रवासी जखमी झाल्याची प्राथमिक माहिती आहे. जखमींमध्ये महिला आणि लहान मुलांचाही समावेश असल्याने दुर्घटनेचे गांभीर्य अधिक वाढले आहे.
काही क्षणांत होत्याचे नव्हते झाले!
मिळालेल्या माहितीनुसार, पुण्यातून नागपूरच्या दिशेने प्रवासी घेऊन जाणारी खासगी बस केंब्रिज चौकातील पुलावरून जात होती. याचवेळी चालकाचे बसवरील नियंत्रण सुटले. वेगात असलेल्या बसने पुलाचा सुरक्षा कठडा तोडला आणि थेट खाली कोसळली. अचानक घडलेल्या या घटनेमुळे बसमधील प्रवाशांना सावरण्याची संधीही मिळाली नाही. पुलाखाली बस आदळताच मोठा आवाज झाला आणि आजूबाजूच्या नागरिकांचे लक्ष घटनास्थळाकडे गेले.
मदतीसाठी नागरिकांची धावपळ
अपघातानंतर बसमध्ये अडकलेल्या प्रवाशांचा आक्रोश सुरू झाला. परिस्थितीचे गांभीर्य लक्षात घेऊन स्थानिक नागरिकांनी तातडीने मदतीसाठी धाव घेतली. पोलिसांच्या मदतीने जखमी प्रवाशांना बसमधून बाहेर काढण्यात आले. त्यानंतर त्यांना तातडीने रुग्णालयात हलवण्यात आले. या दुर्घटनेत एका प्रवाशाला जीव गमवावा लागला, तर अनेक जण जखमी झाले आहेत.
सुनेत्रा पवार यांनी व्यक्त केले दुःख
अपघाताची बातमी समोर आल्यानंतर उपमुख्यमंत्री सुनेत्रा पवार यांनी सोशल मीडियावरून शोक व्यक्त केला. मृत प्रवाशाला श्रद्धांजली वाहत त्यांनी कुटुंबीयांच्या दुःखात सहभागी असल्याचे म्हटले. तसेच जखमींना लवकर बरे वाटावे, अशी प्रार्थना केली.
या अपघातामुळे शहरात हळहळ व्यक्त होत असून, प्रवाशांच्या सुरक्षिततेचा मुद्दा पुन्हा चर्चेत आला आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/CF89MLzjXiJLRGIbwDr7te
*जाहिरातीसाठी_संपर्क करा 8329014805*