🚨 “चोरांचे शहरात पुन्हा आगमन – भरदिवसा घरे फोडून पोलिसांना आव्हान”

छत्रपती संभाजीनगर :  शहरात काही दिवसांच्या शांततेनंतर पुन्हा एकदा चोरट्यांनी डोके वर काढले असून सलग तिसऱ्या दिवशी घरफोडीची घटना घडली आहे. जवाहरनगर पोलीस ठाण्याच्या हद्दीत एका दिवसात दोन घरफोड्यांचे गुन्हे दाखल झाले आहेत. रामचंद्रनगर, टिळकनगर परिसरात अभियंता दाम्पत्याच्या घरात भरदिवसा घुसून चोरट्यांनी तब्बल १५ तोळे सोने आणि ३० हजार रुपयांचा ऐवज लंपास केला आहे. दिवसा घरे फोडण्याच्या घटना घडू लागल्यामुळे पोलीस गस्तीवर गंभीर प्रश्न निर्माण झाला आहे.

पहिली घटना टिळकनगरमधील रामचंद्रनगरमध्ये घडली. पूजा धनंजय जोशी या अभियंता महिला फिर्यादी असून त्या आपल्या कुटुंबासह फ्लॅट क्रमांक ३ मध्ये राहतात. त्यांचे पती धनंजय हे आठ दिवसांपूर्वीच कामानिमित्त बाहेरगावी गेले होते. सासरे रुग्णालयात अॅडमिट असून सासूबाई त्यांच्या सोबत होत्या. दरम्यान, पूजा या दुपारी १२.३० वाजता ड्यूटीवर गेल्या. सायंकाळी ५ वाजता त्या घरी परत आल्यावर मुख्य दरवाजाचे कुलूप तुटलेले दिसले. घरात पाहणी केल्यावर चोरट्यांनी सोने व रोख रक्कम असा एकूण सुमारे १५ तोळ्यांचा ऐवज लंपास केल्याचे स्पष्ट झाले.

घटनेची माहिती मिळताच पोलीस उपनिरीक्षक प्रशांत मुंडे, अंमलदार वामन नागरे व मनोज उईके यांनी घटनास्थळी धाव घेतली. परिसरात मोठमोठे बंगले असूनही बहुतांश ठिकाणी सीसीटीव्ही नसल्याने तपासात अडथळे येत आहेत. त्यामुळे नागरिकांनी घराबाहेर सीसीटीव्ही बसवावेत, असे आवाहन पोलिसांकडून करण्यात आले आहे.

दुसरी घटना विष्णूनगरमधील गल्ली क्रमांक ५ मध्ये घडली. शिवाजी मुरलीधर वाकळे हे कुटुंबासह २ जूनला लग्नासाठी उदगीरला गेले होते. ४ जूनला शेजाऱ्याने त्यांच्या घराचा दरवाजा उघडा असल्याचे सांगितल्यानंतर चोरी उघडकीस आली. मात्र, गुन्हा १६ जूनला नोंदवण्यात आला. चोरट्यांनी अंगठ्या, पेंडल, चांदीचे दागिने व १५ हजार रुपयांची रोकड असा मोठा ऐवज चोरून नेला.

श्वान पथक व ठसेतज्ज्ञांना पाचारण करण्यात आले असून श्वान पथक चोरट्यांचा माग काढत गल्लीच्या कोपऱ्यापर्यंत पोहोचले. मात्र, चोरटे झाडीतून पसार झाले असावेत, असा पोलिसांचा अंदाज आहे. सलग तीन दिवसांत घडलेल्या घटनांनी शहरातील नागरिकांमध्ये भीतीचं वातावरण आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/LUuxEbTCGUGCYza17DWFVv

*जाहिरातीसाठी_संपर्क करा 8329014805*