🌾शेतातच अधिकारी! शेतकऱ्यांच्या बांधावर जाऊन सुसंवादाचा अभिनव उपक्रम सुरू🌿

छत्रपती संभाजीनगर :  शेतकऱ्यांच्या अडचणी त्यांच्या शेतातच ऐकून घेण्यासाठी प्रशासनाने एक अभिनव उपक्रम सुरू केला आहे. जिल्हाधिकारी दिलीप स्वामी यांच्या संकल्पनेतून “बांधा बांधावर शेतकरी-अधिकारी सुसंवाद” उपक्रमाची काल सुरुवात झाली. या उपक्रमाअंतर्गत महसूल, कृषी, ग्रामविकास, भूमी अभिलेख, सहकार, वनविभाग तसेच विविध बँकांचे अधिकारी थेट शेतकऱ्यांच्या बांधावर पोहोचून त्यांच्या समस्या जाणून घेत आहेत.

खरीप हंगामाच्या पार्श्वभूमीवर पीककर्ज, बियाणे, खत, शेतरस्ते, मालकी हक्क, फेरफार, जमिनीच्या नोंदी यांसारख्या विविध मुद्द्यांवर शेतकऱ्यांशी संवाद साधला जात आहे. जिल्हाधिकारी स्वामी यांनी स्वतः वैजापूर तालुक्यातील नांदगाव येथील शेतकरी लक्ष्मण खंडेराव रहाणे यांच्या शेतात जाऊन भेट दिली. त्यांच्या शेतात उभ्या असलेल्या पिकांची पाहणी केली आणि अडचणींवर उपाययोजना सुचविल्या.

या उपक्रमाचा मुख्य उद्देश म्हणजे शेतकऱ्यांना त्यांच्या समस्यांसाठी कार्यालयात हेलपाटे घालण्याऐवजी प्रशासनानेच त्यांच्या बांधावर जाऊन त्या सोडवाव्यात. तालुकानिहाय नियोजन करून प्रत्येक विभागाचे अधिकारी दररोज किमान १० शेतकऱ्यांच्या शेतावर भेटी देतील आणि त्यांच्या तक्रारींचे निवारण करतील.

जिल्हाधिकारी स्वामी यांनी संबंधित अधिकाऱ्यांना गावोगावी जाऊन शेतकऱ्यांच्या समस्या ऐकून तत्काळ तोडगा काढण्याचे स्पष्ट निर्देश दिले आहेत. शेतकऱ्यांच्या विश्वासात भर घालणारा आणि प्रशासनाच्या कार्यपद्धतीत पारदर्शकता निर्माण करणारा हा उपक्रम राज्यभर उदाहरण ठरेल, अशी अपेक्षा व्यक्त होत आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KOOzOvmJm8UAlKfzgNGy49

*जाहिरातीसाठी_संपर्क करा 8329014805*