📲 “खते कुठे उपलब्ध? आता शेतकऱ्यांच्या हातात संपूर्ण माहिती – कृषी विभागाचा अभिनव ब्लॉग सुरू”

छत्रपती संभाजीनगर : शेतकऱ्यांना त्यांच्या परिसरातील कृषी सेवा केंद्रांवर कोणते आणि किती खत उपलब्ध आहे, याची अचूक व पारदर्शक माहिती मिळावी यासाठी कृषी विभागाच्या वतीने विशेष ब्लॉग तयार करण्यात आला आहे. तालुकानिहाय प्रत्येक कृषी सेवा केंद्रावर उपलब्ध असलेल्या खतांचा तपशील गोणी संख्येसह या ब्लॉगवर पाहता येणार आहे. विशेष म्हणजे ही माहिती शेतकऱ्यांना मोबाईलवरून विनामूल्य व सहज उपलब्ध होणार आहे.

खते नसल्याचे कारण देत अनेक दुकानदार खते चढ्या दराने विकत असल्याच्या तक्रारी “अधिकारी शेतकऱ्यांच्या बांधावरती” या उपक्रमात वारंवार प्राप्त होत होत्या. त्या पार्श्वभूमीवर जिल्हाधिकारी दिलीप स्वामी यांच्या मार्गदर्शनाखाली कृषी विभागाने ही महत्त्वाची उपाययोजना राबवली आहे. जिल्हाधिकारी कार्यालयात झालेल्या ऑनलाईन उद्घाटनप्रसंगी उपजिल्हाधिकारी संगीता राठोड, जिल्हा कृषी अधिकारी प्रकाश देशमुख, कृषी विकास अधिकारी प्रकाश पाटील आदी मान्यवर उपस्थित होते.

या ब्लॉगवर छत्रपती संभाजीनगर जिल्ह्यातील नऊ तालुक्यांतील सर्व कृषी सेवा केंद्रांवरील सर्व प्रकारच्या अनुदानित खतांची माहिती प्रत्यक्ष साठ्यानुसार उपलब्ध करून देण्यात आली आहे. यामुळे खते नसल्याचा बनाव करून होणाऱ्या काळाबाजारास अटकाव होणार आहे.

या ब्लॉगचा पत्ता असा आहे –

🔗 https://adochhatrapatisambhajinagar.blogspot.com/p/box-sizing-border-box-margin-0-padding_24.html

या ब्लॉगमध्ये दैनंदिन अद्ययावत माहिती देण्यात येणार असून, कृषी सेवा केंद्र चालकांसाठीही त्यांचा साठा आणि आयएमएफएस प्रणालीवरील माहितीतील तफावत दूर करण्यास हा उपक्रम उपयुक्त ठरणार आहे. या कामासाठी जिल्हा परिषदेचे मोहीम अधिकारी पंकज ताजने यांची नियुक्ती करण्यात आली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KOOzOvmJm8UAlKfzgNGy49

*जाहिरातीसाठी_संपर्क करा 8329014805*