👮‍♀️ हर्सूल पोलिसांची माणुसकीची ड्युटी: मनोरुग्ण महिलेला दिला मायेचा आधार!

छत्रपती संभाजीनगर – कठोर वर्दीत मायेचा स्पर्श असतो, हे पुन्हा एकदा सिद्ध केलं हर्सूल पोलिस ठाण्याच्या कर्मचाऱ्यांनी. कायदा-सुव्यवस्था राखण्याच्या कामात गुंतलेल्या या पोलिसांनी एका मनोरुग्ण महिलेला केवळ रस्त्यावरून उचलून आणले नाही, तर तिला माणुसकीचा आधार देत सुरक्षित निवारा मिळवून दिला.

बेरीबाग परिसरात रात्रीच्या वेळी गल्लीत मदतीसाठी आरडाओरडा करणाऱ्या महिलेकडे महिला पोलिस हवालदार पटेल यांचे लक्ष गेले. त्यांनी क्षणाचाही विलंब न करता तिला सुरक्षितपणे हर्सूल पोलिस ठाण्यात आणले. चौकशीत ती जयश्री अमोल थोरात असून टाकळी ढोकेश्वर गावची रहिवासी असल्याचे समजले. तिचे बोलणे, हावभाव आणि वागणूक पाहून ती मानसिक आजाराने ग्रस्त असल्याचा संशय आला.

घरच्यांनी पुण्याला वेड्यांच्या दवाखान्यात टाकल्याचे ती सांगत होती. “माझ्या दोन मुलांची खूप आठवण येते, पण घरचे मला सांभाळत नाहीत,” असे सांगताना तिच्या डोळ्यांतून अश्रू वाहत होते. उपस्थित सर्वांच्या काळजाला हा क्षण भिडला.

यावेळी पोलिस निरीक्षक सुनीता मिसाळ, उपनिरीक्षक गणेश केदार आणि त्यांच्या सहकाऱ्यांनी ‘माणुसकी’ वृद्ध सेवालयाशी संपर्क साधला. संस्थेचे सुमित आणि पूजा पंडित यांनी जयश्री यांना तात्पुरत्या पुनर्वसनासाठी सेवालयात स्वीकारले.

ही घटना म्हणजे मानवतेचा जिवंत नमुना आहे. हर्सूल पोलिसांनी एका आयुष्याला आधार दिला. तिच्या नातेवाईकांचा शोध सुरू असून, पुन्हा तिचे संसाराचे दिवे पेटावेत यासाठी प्रयत्न सुरु आहेत.

– “माणुसकी अजूनही जिवंत आहे, हर्सूल पोलिसांच्या कृतीतून ती दिसली.”

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KOOzOvmJm8UAlKfzgNGy49

*जाहिरातीसाठी_संपर्क करा 8329014805*