🌩️ छत्रपती संभाजीनगर शहरासह जिल्ह्यात तुफानी पाऊस, अनेक वसाहतींमध्ये पाणी शिरले 🌩️

छत्रपती संभाजीनगर शहरात शुक्रवारी सायंकाळी सहा वाजल्यानंतर हवामानाने अचानक पलटी घेतली. दिवसभर ऊन आणि दमट वातावरणानंतर संध्याकाळी विजांचा कडकडाट, ढगांचा गडगडाट आणि वादळासह पावसाने जोरदार हजेरी लावली. अवघ्या दोन तासांत शहरातील अनेक भाग पाण्याखाली गेले. वीजपुरवठा खंडित झाला, तर वाहतूक खोळंब्यामुळे शहर ठप्प झाले. पडेगाव परिसरात ढगफुटीसदृश पाऊस झाला. अनेक वसाहतींमध्ये पाणी शिरले असून नागरिकांची मोठी तारांबळ उडाली.

पडेगाव, सुंदरनगर, प्रिया कॉलनी, चैतन्यनगर, भावसिंगपुरा, नंदनवन कॉलनी, शरणापूर, मिटमिटा, नगर नाका, स्टेशन परिसर, सातारा आणि बायपास रोड परिसर जोरदार पावसाने पूर्णपणे विस्कळीत झाला. भावसिंगपुरा मंडळात तब्बल १०५ मि.मी. पावसाची नोंद झाली. कोकणवाडीत घरांमध्ये पाणी शिरल्याने एका घराची भिंत कोसळली. नगर नाका रोडवर झाड पडले, कॅन्सर हॉस्पिटलच्या तळमजल्यावर पाणी शिरले. पेठेनगर, विजयनगर, गारखेडा, क्रांतिनगर, नंदनवन कॉलनी, छावणी परिसर, इंदिरानगर आणि सूतगिरणी चौक येथे घरांत पाणी घुसल्याने नागरिक हैराण झाले.

फक्त शहरातच नव्हे तर जिल्ह्यातही पावसाने जोरदार हजेरी लावली. सिल्लोड तालुक्यातील अंभई, कन्नडमधील ताड पिंपळगाव, देवगाव रंगारी, फुलंब्री शहरात मुसळधार पाऊस झाला. खुलताबाद तालुक्यात वीजपुरवठा खंडित झाला. दौलताबाद, माळीवाडा, अब्दीमंडी आणि शरणापूर परिसरातही मुसळधार पावसाची नोंद झाली.

पावसाचे अधिकृत आकडेवारीनुसार चिकलठाणा वेधशाळेत १६.६ मि.मी., एमजीएम पडेगाव स्कूलमध्ये १०५.९ मि.मी., एमजीएम विद्यापीठात २४.१ मि.मी. आणि एमजीएम गांधेली येथे २.४ मि.मी. पावसाची नोंद झाली. हा पाऊस हंगामातील सर्वात मोठ्या सरींपैकी एक असल्याचे हवामान विभागाने सांगितले आहे. नागरिकांना मात्र या तुफानी पावसामुळे घराघरात शिरलेल्या पाण्याचा सामना करावा लागत आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IlPqAw1ds5NJ1KgrzA4SQ8?mode=ems_copy_c

*जाहिरातीसाठी_संपर्क करा 8329014805*