🚨 रोशन गेट ते मदनी चौक अतिक्रमणविरोधी कारवाई; ४० अतिक्रमणे हटवली, ७ वाहनधारकांवर दंडात्मक कारवाई

छत्रपती संभाजीनगर शहरातील थंड बस्त्यात काही दिवसांपूर्वी थांबलेली अतिक्रमणविरोधी कारवाई पुन्हा सुरू झाली आहे. सोमवारी (२९ सप्टेंबर) मनपाच्या अतिक्रमण विभागाने रोशन गेट ते मदनी चौक या मार्गावरील तब्बल ४० अतिक्रमणे हटवली. या कारवाईत रस्त्यावरील वाहतुकीस अडथळा निर्माण करणारे व्यावसायिक व निवासी मालमत्तांसमोरील ओटे, शेड, लोखंडी टपऱ्या तसेच बंद पडलेली व रस्त्यावर उभी केलेली वाहने काढण्यात आली. त्याचबरोबर वाहतूक कोंडीत अडथळा निर्माण करणाऱ्या ७ वाहनधारकांवर दंडात्मक कारवाई करण्यात आली.

रोशन गेट ते मदनी चौक या मार्गावरील अतिक्रमणांमुळे काही दिवसांपासून प्रचंड वाहतूक कोंडी निर्माण होत होती. तीन दिवसांपूर्वी तर एका रुग्णवाहिकेला या कोंडीत तब्बल अर्धा तास अडकून रहावे लागले होते. या घटनेचा व्हिडिओ स्थानिक नागरिकाने तयार करून थेट महापालिका आयुक्त जी. श्रीकांत यांना पाठविला होता. त्यानंतर आयुक्तांनी तातडीने झोन अधिकाऱ्यांना कारवाईचे आदेश दिले. त्यानुसार सोमवारी सकाळीच मनपाच्या अतिक्रमण विभागाचे पथक घटनास्थळी दाखल झाले. कारवाई पाहून अनेक व्यावसायिकांनी स्वयंस्फूर्तीने स्वतःची अतिक्रमणे हटविण्यास सुरुवात केली.

या कारवाईदरम्यान अनेक लहान-मोठे शेड, कच्चे-पक्के ओटे तसेच लोखंडी टपऱ्या काढून टाकण्यात आल्या. नियंत्रण अधिकारी संतोष वाहुळे यांच्या मार्गदर्शनाखाली प्रभाग क्रमांक ३ चे सहाय्यक आयुक्त नईम अन्सारी, इमारत निरीक्षक सय्यद जमशेद, संजय सुरडकर, मजहर खान, नागरी मित्र पथकप्रमुख प्रमोद जाधव यांच्यासह मनपा कर्मचाऱ्यांनी ही कारवाई केली.

मनपाने जाहीर केले आहे की आज (मंगळवार, ३० सप्टेंबर) रोजी मदनी चौक ते सेंट्रल नाका व चंपा चौक-जिंजी ते दमडीमहल या मार्गांवर अतिक्रमणविरोधी मोहिम राबवली जाणार आहे. नागरिक व व्यापाऱ्यांनी स्वखुशीने आपली अतिक्रमणे हटवावीत, अन्यथा कारवाई करण्यात येईल, असे आवाहन प्रशासनाने केले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/Ii8cI59VTTI77JxAW1zpnq?mode=ems_copy_t

*जाहिरातीसाठी_संपर्क करा 8329014805*