🌾 आत्महत्याग्रस्त शेतकऱ्यांच्या कुटुंबांना दिवाळीपूर्वी दिलासा — प्रशासनाचा ‘एक हात मदतीचा’ उपक्रम 🌾

छत्रपती संभाजीनगर :  दिवाळी सणाच्या पार्श्वभूमीवर जिल्हा प्रशासनाने एक संवेदनशील पाऊल उचलत आत्महत्याग्रस्त शेतकरी कुटुंबियांना ‘एक हात मदतीचा’ उपक्रमांतर्गत दिलासा दिला. जिल्हाधिकारी दिलीप स्वामी यांच्या हस्ते या कुटुंबियांना फराळ साहित्य, किराणा सामान आणि रब्बी हंगामासाठी बियाणे किट वाटप करण्यात आले. “संकटाच्या काळात खचून जाऊ नका, प्रशासन आणि समाज तुमच्या सोबत ठामपणे उभा आहे,” असे आश्वासन जिल्हाधिकारी स्वामी यांनी दिले.

हा उपक्रम जिल्हाधिकारी कार्यालयातील नियोजन सभागृहात पार पडला. पैठण, फुलंब्री आणि छत्रपती संभाजीनगर तालुक्यातील आत्महत्याग्रस्त शेतकऱ्यांच्या कुटुंबियांना या कार्यक्रमात मदत करण्यात आली. या उपक्रमासाठी मराठवाडा ग्रामीण विकास संस्था आणि वेरुळ येथील घृष्णेश्वर ज्योतिर्लिंग संस्थान यांनी सहकार्य केले.

कार्यक्रमास जिल्हाधिकारी दिलीप स्वामी, अपर जिल्हाधिकारी संभाजी अडकुने, मराठवाडा ग्रामीण विकास संस्थेचे मनसुख झांबड, निवासी उपजिल्हाधिकारी जनार्दन विधाते, उपजिल्हाधिकारी संगीता राठोड, तसेच पैठणच्या उपविभागीय अधिकारी नीलम बाफना, तहसीलदार ज्योती पवार, फुलंब्री तहसीलदार योगिता खटावकर आदी अधिकारी उपस्थित होते.

जिल्हाधिकारी स्वामी म्हणाले, “शेतकऱ्यांच्या आत्महत्यांसारखी दुर्दैवी घटना समाजासाठी अत्यंत वेदनादायक आहे. मात्र या कठीण काळात प्रशासन आणि सामाजिक संस्था तुमच्यासोबत आहेत, हा विश्वास आम्ही या उपक्रमातून निर्माण करू इच्छितो.” त्यांनी पुढे सांगितले की, शासनाच्या विविध योजनांचा लाभ या कुटुंबांपर्यंत पोहोचविण्यासाठी प्रशासन कटिबद्ध आहे.

या मदतीत शासन निर्णयानुसार देय आर्थिक सहाय्यासोबत संजय गांधी निराधार योजना, श्रावण बाळ योजना यांसारख्या सामाजिक योजनांचा लाभही देण्यात आला. तसेच प्रशासनातील अधिकारी आणि कर्मचाऱ्यांनीही स्वतःचे योगदान देत या कुटुंबियांना दिलासा दिला.

या उपक्रमांतर्गत जिल्ह्यातील एकूण २६७ शेतकरी कुटुंबांना मदत देण्यात आली आहे. आज छत्रपती संभाजीनगर, पैठण, फुलंब्री आणि सिल्लोड तालुक्यातील लाभार्थींना किट वितरित करण्यात आली. उद्या (शुक्रवार, दि. १७) सकाळी कन्नड येथे कन्नड आणि खुलताबाद तालुक्यांसाठी तर दुपारी लासूर स्टेशन येथे वैजापूर व गंगापूर तालुक्यांसाठी मदत वाटप करण्यात येणार आहे.

‘एक हात मदतीचा’ हा उपक्रम जिल्हा प्रशासनाने सेवा पंधरवाड्यानिमित्त विशेष राबवला. आत्महत्याग्रस्त शेतकऱ्यांच्या कुटुंबांचे सर्वेक्षण करून ज्यांना खरोखर मदतीची गरज आहे अशा कुटुंबांची निवड करण्यात आली. प्रत्येक किटमध्ये फराळ साहित्य, आवश्यक किराणा सामान आणि रब्बी हंगामासाठी लागणारे बियाणे यांचा समावेश आहे.

या उपक्रमाद्वारे छत्रपती संभाजीनगर तालुक्यातील ३९, पैठणमधील ४०, फुलंब्रीमधील ३०, सिल्लोडमधील ६२, सोयगावमधील १२, कन्नडमधील ३६, खुलताबादमधील ४, वैजापूरमधील १० आणि गंगापूरमधील ३४ शेतकरी कुटुंबांना मदतीचा हात देण्यात येणार आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IUr4T19zTCmAWLrpodS5ui?mode=ems_copy_t

*जाहिरातीसाठी_संपर्क करा 8329014805*