📢 बारावीचा निकाल उद्या होणार जाहीर; विद्यार्थ्यांची प्रतीक्षा अखेर संपणार!

पुणे : राज्यातील लाखो विद्यार्थ्यांची प्रतीक्षा अखेर संपणार असून महाराष्ट्र राज्य माध्यमिक व उच्च माध्यमिक शिक्षण मंडळाकडून (HSC) बारावीचा निकाल शनिवार, दिनांक २ मे २०२६ रोजी जाहीर करण्यात येणार आहे. सकाळी ११ वाजता बोर्डाच्या कार्यालयात पत्रकार परिषद घेऊन निकालासंदर्भातील सविस्तर माहिती दिली जाणार आहे. त्यानंतर दुपारी १ वाजल्यापासून विद्यार्थ्यांना आपला निकाल ऑनलाइन पद्धतीने पाहता येणार आहे.

फेब्रुवारी–मार्च २०२६ या कालावधीत घेण्यात आलेल्या उच्च माध्यमिक प्रमाणपत्र (इयत्ता १२ वी) परीक्षेला राज्यभरातून मोठ्या संख्येने विद्यार्थी बसले होते. या परीक्षेचा निकाल अधिकृत संकेतस्थळ mahahsscboard.in वर उपलब्ध करून देण्यात येणार आहे. विद्यार्थ्यांनी आपला आसन क्रमांक आणि आवश्यक तपशील भरून निकाल सहज पाहता येईल.

निकाल जाहीर होण्यापूर्वी होणाऱ्या पत्रकार परिषदेत राज्याचा एकूण निकाल, विभागनिहाय निकालाचा टक्का, उत्तीर्ण विद्यार्थ्यांची संख्या, तसेच मुला-मुलींच्या निकालातील प्रमाण याबाबत सविस्तर माहिती दिली जाणार आहे. यामुळे विद्यार्थ्यांसह पालक आणि शिक्षकांमध्येही उत्सुकता वाढली आहे.

काही दिवसांपूर्वी केंद्रीय माध्यमिक शिक्षण मंडळाचा (CBSE) निकाल जाहीर झाल्यानंतर राज्य बोर्डाच्या निकालाच्या तारखेची सर्वजण आतुरतेने वाट पाहत होते. अखेर ही प्रतीक्षा संपत असून विद्यार्थ्यांच्या पुढील शिक्षणाचा मार्ग या निकालावर अवलंबून असणार आहे.

दरम्यान, निकाल पाहताना अधिकृत संकेतस्थळावरच विश्वास ठेवावा आणि कोणत्याही अफवांवर विश्वास न ठेवण्याचे आवाहन शिक्षण मंडळाकडून करण्यात आले आहे. तसेच निकाल जाहीर झाल्यानंतर विद्यार्थ्यांनी गुणपत्रिकेची छाननी करून आवश्यक असल्यास पुनर्मूल्यांकनासाठी अर्ज करण्याची सुविधा देखील उपलब्ध करून देण्यात येणार आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IFiUHSaNdeRHc992rS9iqG?mode=gi_t

*जाहिरातीसाठी_संपर्क करा 8329014805*