🔥 पुन्हा वाढला सूर्याचा तडाखा! छत्रपती संभाजीनगर ४२.४ अंशांनी तापले; उकाड्याने नागरिक हैराण

छत्रपती संभाजीनगर : शहरासह जिल्ह्यात मागील काही दिवसांपासून उकाड्याने नागरिक हैराण झाले आहेत. मागील चार दिवसांपासून कमाल तापमान चाळीशीच्या आत राहिल्याने काहीसा दिलासा मिळाला होता. मात्र रविवारी पुन्हा तापमानात मोठी वाढ होत कमाल तापमान ४२.४ अंश सेल्सिअसपर्यंत पोहोचले. त्यामुळे दुपारच्या वेळेत रस्त्यांवर शुकशुकाट पाहायला मिळाला. एप्रिल अखेरपासूनच उन्हाची तीव्रता वाढू लागली असून मे महिन्यात तापमानाने ४३ अंशांचा टप्पाही पार केला आहे. यामुळे नागरिकांचे जनजीवन विस्कळीत होत आहे.

दरम्यान, शनिवारी (दि.९) सायंकाळच्या सुमारास शहरात काही भागांत हलक्या पावसाच्या सरी कोसळल्या होत्या. या पावसामुळे वातावरणात किंचित गारवा निर्माण झाला होता. तसेच चिकलठाणा वेधशाळेने कमाल तापमानात थोडी घट झाल्याची नोंद केली होती. मागील तीन ते चार दिवसांपासून आकाशात ढगांची ये-जा सुरू असल्याने उन्हाचा तडाखा काहीसा कमी जाणवत होता. मात्र हवेत आर्द्रता वाढल्याने उकाडा कायम होता. रविवारी पुन्हा सूर्याने आग ओकण्यास सुरुवात केल्याने नागरिकांचा घामाघूम झाला. हवामान विभागाने पुढील काही दिवस उष्णतेची लाट कायम राहण्याची शक्यता व्यक्त केली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*